လောကဓံမိုး

                       

   အပြင်မှာ မိုးတွေရွာနေတယ်။

    မိုးကိုမျှော် နေတာကြာပါ ပြီ ။ အခုမှပဲမိုးကိုမြင်ရတော့တယ်။ မိုးမရွာခင်က ပူလိုက်တာ။

မိုးတွေရွာနေတော့ 'မိုးရွာသောနေ့ '   "Raining Day" နဲ့  ပတ်သက်ပြီး တွေးမိတာလေးတွေ ရေးချင်လာတယ်။

            လူတိုင်းသိပြီးသား ပုံပြင်လေးတစ်ပုဒ် ရှိတယ်။

            တစ်ခါတုန်းက ပုရွက်ဆိတ်ကလေးတစ်ကောင်နဲ့  နှံကောင်လေး အကြောင်းပေါ့။ ဒီပုံပြင်အကြောင်းကိုတော့ ဖွဲ့နွဲ့ပြီး မရေးချင်တော့ပါဘူး။ ပျော်ကြူးတတ်တဲ့ နှံကောင်လေးနဲ့  အနာဂါတ်ကို ကြိုတင်ပြင်ဆင်တတ်တဲ့ဝီရီယရှိတဲ့ပုရွက်ဆိက် အကြောင်းကို လူတိုင်းသိပြီးသားပါ။

တစ်နေ့ နေ့ မှာ မိုးရွာမယ်။ အဲဒီအတွက်အစာကို ကြိုတင်စုဆောင်းနေတဲ့ ပုရက်ဆိတ်ကလေးရယ်။ ဘာပဲ ဖြစ်ဖြစ်ပျော်ဖို့ သာ အဓိကဆိုတဲ့ နှံကောင်လေးရယ်။

သူတို့ကြောင်းမှာ'' မိုးရွာသောနေ့ ''  ဆိုတာပါတယ်။ တကယ်လည်း မိုးရွာလာတော့ အပျော်ကြူးတဲ့ နှံကောင်လေး ဒုက္ခရောက်ရတယ်။

            အဲဒီအကြောင်းကို ဆက်ပြီးတွေးနေမိတယ်။

            ကျွန်တော်တို့ မိသားစုဟာ နှံကောင်ဘ၀ကို ရောက်ခဲ့ဖူးတယ်။ အဖေကရုံးအုပ်စာရေးကြီး ဆိုတော့ သူ့ရုံးအလုပ်နဲ့သူကပျော်တယ်။သူ့မိတ်ဆွေတွေနဲ့ သူက ပျော်တယ်။ဝန်ထမ်းအိမ်ရာမှာ နေရတာကို ကျေနပ်နေတယ်။ လကုန်ရင် လခရတယ်။ ရတဲ့လခနဲ့ လောက်အောင်စားရတယ်။ ချေးလိုက် ငှားလိုက် ပြန်ဆပ်

လိုက်၊ပြန်ချေးလိုက်နဲ့  ကျွန်တော်တို့ဘ၀မှာ အကြွေးတွေ သံသရာလည်ခဲ့ဖူးတယ်။

Rain Day လို့ ခေါ်တဲ့ မိုးရွာတဲ့တစ်နေ့ကို ရောက်လာခဲ့တယ်။အဲဒီနေ့က အဖေပင်စင်ယူတဲ့နေ့ပေါ့။ ကျွန်တောတို့ မှာနေစရာမရှိဘူး။အိမ်ငှားနဲ့နေဖို့  ကလည်း ရေရှည်မလွယ်ဘူး။ ကျွန်တော်တို့ ငိုခဲ့ရဖူးတယ်။ ဘ၀ကိုစိတ်ကုန်ခဲ့ရဖူးတယ်။ Rain Day ကိုကျွန်တော်တို့ မိသားစုမေ့ နေကြတယ်။ တကယ်လည်းRaining Day ကိုကြုံရော အားလုံး ဒုက္ခ ရောက်ကြရတော့တာပါပဲ။မိုးတွေရွာနေတာကို ကြည့်ပြီး ကျွန်တော်ရဲ့  ငယ်ဘ၀ကို စဉ်းစားနေမိတယ်။

            ကြိုတင်ပြင်ဆင်တတ်တဲ့သူက  ဒုက္ခ မရောက်ဘူး။

            ကြိုတင်ပြင်ဆင်မှုမရှိခြင်းဟာ ကြိုတင်ပြီး အရှုံးပေးခြင်းတစ်မျိုးပါပဲ။

            စာသင်ခန်းထဲကတပည့်တော်များများဟာလည်း "နှံကောင်" တွေပါပဲ။ အပျော်ကြူးနေကြတယ်။ ကြိုတင်မပြင်ဆင်ဘူး။ တက္ကသိုလ်ဝင်တန်း စာမေးပွဲဖြေတဲ့အချိန်ဟာ Raining Day ပါပဲ။ ဒီနေ့ခေတ်လူငယ်တော်တော်များများဟာ အပျင်းထူတယ်။ ခိုင်းမှလုပ်တတ်တယ်။ ဘေးက ကူညီတဲ့လူတစ်ယောက်မပါပဲ ဘာမှ မလုပ်တတ်ဘူး။ သူတို့တတွေရဲ့ဘ၀မှာ Raining Day တွေအများကြီး ကြုံရဦးမှာပါ။

            ကျွန်တော့်မှာ သူငယ်ချင်းတစ်ယောက်ရှိတယ်။သူကနို့ ဆီစက်ရုံတစ်ခုမှာ အလုပ်လုပ်တယ်။ သူ့ ဘ၀ကို သူကျေနပ်နေတယ်။ အဲဒီကြားထဲမှာ အသောက် အစားကလည်းရှိတယ်။ဒီလိုနဲ့ တစ်နေ့ကသူဆေးရုံတက်ရတယ်။အသည်းရောဂါဖြစ်လို့ တဲ့။ ဆေးကုစရာပိုက်ဆံကလည်း မရှိဘူး။ သူ့သားသမီးတွေကလည်းငိုနေကြတယ်။သူအမျိုးသမီးကလည်းဘာမှ  မလုပ်တတ်ဘူး။ နောက်ဆုံးတော့ ကျွန်တော့တို့ သူငယ်ချင်းတွေစုပြီး သူ့ကိုကူညီကြရတယ်။ကျွန်တော်တို့ကလည်း ဘယ်တိုင်းအတာထိ ကူညီနိုင်မှာလည်း။သူနေတဲ့အိမ်ကလည်း အိမ်လခ၊အိမ်စပေါ်တွေတောင်းနေပြီ။ သူ့ကိုကြည့်ပြီး စိတ်မကောင်းဖြစ်မိတယ်။ သြော်...' နှံကောင်' လိုလူတွေအမှားကြီးပါလား။ Raining Day ကြုံ ရတော့  သူဘာမှ မတတ်နိုင်ဘူး။

            ကျွန်တော်တို့ အရပ်ထဲမှာ ကျောင်းအုပ်အငြိမ်းစားဆရာကြီးတစ်ယောက်ရှိတယ်။ သူကတော့ပုရွက်ဆိတ်လို လူတစ်ယောက်ဖြစ်တယ်။ ကျောင်းဆရာဘ၀မှာစုစုဆောင်းဆောင်းနေခဲ့တယ်။ လုပ်သက်နဲ့ ရတဲ့မြေကို ရောင်းမစားဘူး။အဲဒီမြေပေါ်မှာပဲ တဲအိမ်လေးတစ်လုံးထိုးပြီး နေတယ်။ ပင်စင်ရပြီးကတည်းကညနေစာမစားဘူး။ ဥပုသ်စောင့်တယ်။ ကျန်းမာရေးလိုက်စားတယ်။ ပရဟိတအလုပ်တွေနဲ့  အချိန်ကို အသုံးချတယ်။ရှိတာလေးနဲ့ လောက်အောင်စားတယ်။ မနက်တိုင်းလမ်းလျှောက်ထွက်တယ်။ နေ့ တိုင်းတရားထိုင်တယ်။လှူစရာရှိရင် စနစ်တကျလှူတယ်။ စည်းကမ်းရှိတယ်။ူအမြဲပြောတဲ့စကားတစ်ခွန်းရှိတယ်။ " ကြိုတင်ပြင်ဆင်တယ်ဆိုသူရဲကောင်းတွေရဲ့ အပြုအမူကွ"။  ကျုပ်ပိုင်တဲ့ စည်းစိမ်တွေက ကျုပ်ကိုငရဲပြည်ရောက်ဖို့  ဆွဲခေါ် နေတယ်။ အဲဒီအရွယ်မှာပိုက်ဆံများများမလိုဘူး။ငွေစက္ကူဟာငရဲပြည်သွားဖို့ လက်မှမဟုတ်ဘူး။ လူတချို့ ကတော့ငွေစက္ကူကိုတွယ်တာနေရင်းနဲ့ အဲဒီငွေစက္ကူဟာငရဲပြည်သွားဖို့ လက်မှတ်တွေဖြစ်ကုန်ကြတယ်''

            သူပြောတဲ့စကားဟာမှတ်သားလောက်တယ်။ အဓိပ္ပါယ် ရှိတဲ့ပိုင်ဆိုင်မှုကသာအ ဓိပ္ပါယ်တဲ့ဘ၀ကို ဖြစ်စေနိုင်တယ်။

            ဒီလိုပါပဲ။ပေါ့ပေါ့ပါးပါးလေး လုပ်ကိုင်နေရင်းနဲ့လည်းအောင်မြင်မှုဆိုတာ ရချင်ရတတ်တယ်။ လူတွေရဲ့ နှုတ်ဖျားက ချီးမွမ်းခြင်းနဲ့ ကဲ့ရဲ့ ခြင်းအကြားမှာ ၀မ်းနည်းခြင်း ၀မးသာခြင်းတွေနဲ့ ဘ၀ကိုတည်ဆောက်နေကြရတယ်။

            လောကဓံဆိုတာ လူတွေကို ဘ၀င်မမြင့်ဖို့ ၊ ဘ၀မမေ့ဖို့၊ ဆုံးမပေးတဲ့သဘာဝကပေးတဲ့ဆရာကြီး တစ်ပါးပဲ။

            လောကဓံဆိုတာ အတ္တနဲ့  မာနကို မှန်မှန်ကန်ကန်  ချိုးနှိမ်းပေးတဲ့ဆေးတစ်လက်ပဲ။လောကဓံဆိုတာ Raining Day ပဲလေ။ကျွန်တော်ဘ၀မှာ Raining Day တွေ ကြုံ ခဲ့ပြီးပြီ ။နောက်ထပ်လည်း Raining  day  တွေကြုံ ကြရ ဦးမယ်။ Raining Day နဲ့ ကြုံတဲ့အခါ  တစ်ခါတစ်လေ ပုရွက်ဆိတ်ဖြစ်လို တစ်ခါတစ်လေနှံကောင်ဖြစ်လိုက်နဲ့ ။သေချာတာတစ်ခုကတော့ ဘ၀အတွက်ကြိုတင်ပြင်ဆင်တတ်ခြင်း ဆိုတဲ့ လေ့အကျင့်ရှိဖို့ ပါပဲ။

            မိုးရွာသောနေကရယ်၊ပုရွက်ဆိတ်တစ်ကောင်ရယ်၊နှံကောင်လေးတစ်ကောင်ရယ်။ကျွန်တော်ရယ်။ ကျွန်တို့ ဘ၀မှာ ဆင်ခြင်စရာတွေ  အတုယူစရာတွေ သံဝေဂတွေ  သတိပြုစရာတွေ အများကြီးပါလားလို့ … ကျွန်တော် တွေးနေမိတယ်။ လူတိုင်းလူတိုင်းဘ၀မှာRaining  Day ဆိုတာ ရှိ နေဦးမှာပါ။

ဟော…

အပြင်မှာ မိုးတွေရွာနေတယ်။

ကျွန်တော်တို့ဟာ

ပုရွက်ဆိတ်လေးတစ်ကောင်လား။

နှံကောင်းလေးတစ်ကောင်လား။

ဘာပဲဖြစ်ဖြစ် ' လောကဓံမိုး '            ကတော့အကြိမ်ကြိမ် ရွာနေဦးမှာပါ။

                                                        

 *******************************

ဦးဘုန်း(ဓါတု)

မန္တလေး

 သုည

အတွေးရသစာစု စာအုပ်မှ

                                   

                                                                                                                                                                                                                                                                                                                                   

`` ထီ ``

``ဟူး…. ဒီတစ်ပတ်လည်း ထီမပေါက်ပါလား``

ထိုးထားတဲ့ ထီတွေရယ်၊ ထီပေါက်စဉ်ရယ် တိုက်ပြီး ကျွန်တော် ညည်းတွားမိတယ်။ လဆန်းတိုင်း ထီဖွင့်ရက်ဆိုရင် ထီပေါက်လိမ့်မလားလို့ဆိုတဲ့မျှော်လင့်ချက်နဲ့ ထီတိုးခဲ့တာ ဒီအသက် ဒီအရွယ်ထိပါပဲ။ ထီထိုးတိုင်း လိပ်စာပေးခဲ့တယ်။ ဖုန်းနံပါတ်ပေးခဲ့တယ်။ လစဉ် လဆန်း (၁) ရက်၊ (၂)ရက် ဆိုရင် ထီပေါက်ကြောင်း ဘယ်သူများ လာပြောမလဲလို့ အမြဲရင်ခုန်မိတယ်။ ထီပေါက်ကြောင်း ဖုန်းများဆက်လေမလားလို့ ဖုန်းသံကြားတိုင်း စိတ်လှုပ်ရှားမိတယ်။

မြတံခွန်နဲ့ အောင်သန်းဆု  ထီဆိုင်ကြီးတွေက သိန်းထောင်ဆုပေါက်တဲ့ သူကို အပိုဆုပေးတဲ့ အခမ်းအနားပွဲတွေ တွေ့တိုင်း အားကျမိတယ်။ တစ်နေ့… အဲဒီနေရာမှာကိုယ်ဖြစ်ရမယ်ဆိုတဲ့ အသိစိတ် ရင်ထဲမှာအမြဲရှိနေတယ်။ ရုပ်ရှင်သရုပ်ဆောင်တွေနဲ့တွဲပြီး ဓာတ်ပုံရိုက်လိုက်မယ်ဆိုတဲ့ စိတ်ကူးကလည်း ရှိနေသေးတယ်။

ကျွန်တော် တစ်ခါမှ ထီမပေါက်ဘူးပါ။ ဒါပေမဲ့ ထီပေါက်လိမ့်မယ်လို့ လုံးဝယုံကြည်ပါတယ်။ ဒီကနေ့ထိတော့  စိတ်ဓာတ်မကျပဲ ထီကို ဇွဲရှိရှိနဲ့ ထိုးဆဲပါ။ အတိတ်က ဒါနမျိုးစေ့ ဘယ်လောက်ရှိသလဲ သိချင်လို့ လစဉ်ထီထိုးပါတယ်။ လစဉ်လည်း မျှော်လင့်ပါတယ်။

လက်ဖက်ရည်ဆိုင်တွေမှာထီရောင်းတဲ့ကလေးတွေ ရှိပါတယ်။ သူတို့ကိုတွေ့ရင် ကျွန်တော် ထီ အမြဲတမ်းထိုးတယ်။ အလကားနေရင်းတောင် ဆေးလိပ်သောက်၊ ကွမ်းစား၊ ဘီယာဆိုင်ထိုင်ပြီး ပိုက်ဆံတွေ ကုန်သွားတက်သေးတာ။ ထီထိုးတယ်ဆိုတာ ထီမဖွင့်မချင်း ငါ ထီပေါက်နိုင်တယ်ဆိုတဲ့ အရသာရှိတဲ့ စိတ်ကလေးနဲ့ နေရထိုင်ရတာ အင်မတန်ကို ကြည်နူးစရာကောင်းတယ်။ ဒါပေမဲ့ ထီမပေါက်ခဲ့ဖူးဆိုရင်လည်း တစ်လအတွင်း ပြန်ပြီး ကံစမ်းခွင့်ရှိတယ်။ လစဉ် လဆန်းတိုင်း၊ ရင်ခုန်ရတဲ့ အရသာကို ထီထိုးဖူးသူတိုင်း သိကြပါတယ်။

***************

ကျွန်တော် ညနေ (၃)နာရီဆိုရင် ``မင်းမဟာ`` လက်ဖက်ရည်ဆိုင်မှာ ထိုင်နေကျပါ။ ``လက်ဖက်ရည်မိတ်ဆွေ`` တွေ ကျွန်တော့်မှာ ရှိပါတယ်။ စကားပြောဖော်ပြောဖက်တွေပါ။ စာပေဆွေးနွေးဖော် ဆွေးနွေးဖက်တွေပါ။ ထီထိုးဖော်ထိုးဖက်တွေပါ။ လက်ဖက်ရည်ဆိုင် ထိုင်တယ်ဆိုတော့ ရောက်တက်ရာရာတွေ ပြောတက်ကြပါတယ်။

တစ်ခါတလေလည်း ဘောလုံးပွဲအကြောင်း၊ တစ်ခါတစ်လေလည်း ကမ္ဘာသတင်း… နိုင်ငံသတင်းအကြောင်း၊ တစ်ခါတလေကျတော့လည်း ရာသီဥတုအကြောင်း၊ သဘာဝပတ်ဝန်းကျင်အကြောင်း ပြောဖြစ်ကြတယ်။ တစ်ခါတလေ ကျတော့လည်း တရားဓမ္မအကြောင်း၊ တရားစခန်းအကြောင်း ပဋိစ္စသပုပ္ပါဒ် အကြောင်း ပြောဖြစ်ပြန်တယ်။ တစ်ခါတလေတော့လည်း ဘီယာဆိုင်က ကောင်မလေးတွေအကြောင်း မြေဈေးအကြောင်း၊ အိမ်ဈေးအကြောင်း၊ ပြောဖြစ်ပြန်တယ်။

လကုန်ခါနီးတိုင်း ပြောဖြစ်တာကတော့ ထီဖွင့်ခါနီးပြီဆိုတဲ့အကြောင်း၊ ထီပေါက်ရင်ဘယ်လိုကဲလိုက်မယ်…၊ ဘာတွေဝယ်လိုက်မယ်..၊ ဘယ်တွေ သွားလိုက်တယ် ဆိုတဲ့အကြောင်း ပြောဖြစ်ကြတယ်။

ကျွန်တော်တို့ စကားပြောတဲ့ လကုန်ခါနီးတစ်ရက်မှာ ကျွန်တော့်ရဲ့မိတ်ဆွေ တစ်ယောက်က စကားပြောရင်း ``ခေါင်းမူးတယ်`` လို့ ပြောတယ်။ သူ အိမ်ပြန်သွားတယ်။ ကျွန်တော်လည်း (၄)နာရီထိုးတော့ စာသင်ဖို့ အတွက် အတန်းတွေရှိတဲ့ဆီကို သွားခဲ့ရတယ်။ ပထမအချိန် ပြီးခါနီး ညနေ (၅)နာရီလောက်မှာ ကျွန်တော့်ဆီကို တယ်လီဖုန်း မြည်လာတယ်။ ညနေက ခေါင်းမူးပြီး အိမ်ပြန်သွားတဲ့ ကျွန်တော့်မိတ်ဆွေ သွေးတိုးဖြစ်ပြီး ဆုံးသွားတယ်တဲ့…။

ကျွန်တော် အရမ်းအံ့သြသွားတယ်။ ညနေကမှ ထီပေါက်ရင်… ဘာလုပ်မယ်၊ ညာလုပ်မယ်ဆိုပြီး ကျွန်တော်တို့ ပြောခဲ့ကြသေးတာ။ အခုသူက မရှိတော့ဘူးတဲ့.. မြန်လိုက်တာ။ ဒီလိုနဲ့ သူ့အသုဘကို ကျွန်တော် လိုက်ပို့ရတယ်။ အသုဘ လိုက်ပို့ရင်း ကျွန်တော်စဉ်းစားမိတာလေး ပြောပြပါရစေ။

……

မြန်မာနိုင်ငံမှာ လူသန်းပေါင်း (၅၀)ကျော် ရှိတယ်။ တစ်လကို သိန်း (၁၀၀၀) ထီတစ်ဆုပဲ ဖွင့်တယ်။ လူသန်းပေါင်း (၅၀) ထဲမှာ တစ်ယောက်သာလျှင် ပိုင်ဆိုင်ခွင့်ရှိတဲ့ သိန်း (၁၀၀၀) ဆုကို ကျွန်တော်တို့ အမြဲမျှော်လင့်ကြတယ်။ ဒီလမပေါက်ရင် နောက်လပေါက်လိမ့်မယ်လို့ ကျွန်တော်တို့ အမြဲမျှော်လင့်ကြတယ်။ ဒီလမပေါက်ရင် နောက်လပေါက်လိမ့်မယ်လို့ ကျွန်တော်တို့ အမြဲယုံကြည်ကြတယ်။ ထီမပေါက်သေးဘူး.. ပေါက်ခဲ့ရင် လှူမယ်၊ တန်းမယ်၊ ရွှေဝယ်မယ်၊ မြေဝယ်မယ်၊ ကဲမယ်၊ သုံးမယ်၊ ငွေဆောင်သွားမယ်၊  ချောင်းသာသွားမယ်၊ မိသားစုနဲ့ ဘုရားဖူးထွက်မယ်၊ ကားဝယ်မယ်၊ လုပ်ငန်းတစ်ခုခုမှာ ငွေအရင်းထည့်ပြီး စီးပွားရေး လုပ်ပစ်လိုက်မယ်…။ ဒီလိုတွေးပြီး စိတ်ကူးတွေယဉ်လိုက်ကြရတာ လစဉ်တိုင်းပါပဲ။ ကျွန်တော်လည်း သိန်း (၁၀၀၀) ထီမပေါက်ဖူးဘူး။ ကျွန်တော့်သူငယ်ချင်းတွေထဲမှာလည်း သိန်း (၁၀၀၀) ထီပေါက်တဲ့သူ မကြားဖူးဘူး။

အခု… သေသွားတဲ့ကျွန်တော့်မိတ်ဆွေဟာ သိန်း (၁၀၀၀) ထီပေါက်ရင် ဘာလုပ်မယ်၊ ဘာလုပ်မယ်ဆိုပြီး အမြဲပြောတက်တဲ့သူ။ ဒါပေမဲ့ သူ… မရှိတော့ဘူး။ မသေချာတဲ့ သိန်း(၁၀၀၀) ထီပေါက်ဖို့ ယုံကြည်မျှော်လင့်နေကြတဲ့ ကျွန်တော်တို့ မေ့နေတာ တစ်ခုရှိတယ်။ လူသန်းပေါင်း (၅၀) ထဲမှာ သိန်း (၁၀၀၀) ထီပေါက်ဖို့ က မသေချာဘူး။ တစ်ယောက်တည်းသာ ဖြစ်နိုင်တယ်။ အဲဒီတစ်ယောက်ဟာ ကိုယ်ဖြစ်မယ်လို့ အမြဲစိတ်ကူးယဉ်ခဲ့ကြတယ်။ လူသန်းပေါင်း (၅၀) ထဲမှာ နေ့စဉ် နေ့စဉ် သေဆုံးနေကြတဲ့ လူတွေကို မြင်တိုင်း အဲဒီတစ်ယောက်ဟာ ငါဖြစ်နိုင်တယ်လို့ မတွေးခဲ့မိဘူး။ စိတ်မကူးခဲ့ဖူး။

သေဖို့ကတော့ သေချာတယ်။ ထီပေါက်ဖို့က မသေချာဖူး။

ဒါပေမဲ့ ငါ.. သေမယ်လို့ တစ်ခါမှ မတွေးမိဖူး။ မန္တလေးမြို့မှာဆိုရင် နေ့စဉ် လူ (၇၀) လောက်၊ သေနှုန်းရှိတယ်။ တစ်လကို လူ (၂၀၀၀) ကျော်လောက် သေတယ်။ အဲဒီထဲမှာ ကိုယ်ပါနိုင်တယ်လို့ တစ်ခါမှ မတွေးမိဖူး။ ဒါပေမဲ့  လူသန်း (၅၀) မှ တစ်ယောက်သာဖြစ်နိုင်တဲ့ သိန်း (၁၀၀၀) ထီကိုတော့ ကိုယ့်အလှည့် ရောက်နိုင်တယ်လို့ အမြဲတွေးမိတယ်။

ကျွန်တော့်တို့ စိတ်တွေဟာ သိပ်ပြီးအံ့သြစရာကောင်းတယ်။ အကောင်းတွေကိုတော့ အမြဲမျှော်လင့်တယ်။ အဆိုးတွေကိုတော့ နားနဲ့တောင် မကြားချင်ဖူး။

ဗေဒင်ဆရာက ထီပေါက်နိုင်တယ်လို့ပြောရင် ကြိုက်တယ်။ ဘယ်ဆိုင်က ထိုး၊ ဘယ်ဂဏန်းကိုထိုး၊ ဘယ်နေ့သားနဲ့တွဲထိုး၊ ဘယ်နေ့ထိုး၊ ဘယ်အချိန်ထိုး၊ ထီထိုးရင်း စိတ်ကူးလိုက်ရတာ ပျော်စရာပါ။ ဒါပေမဲ့ ဗေဒင်ဆရာက ဘယ်နေ့သေနိုင်တယ်လို့ပြောရင် မကြိုက်ချင်ဘူး။ ဘယ်ရောဂါနဲ့ သေမယ်။ ဘယ်လိုပုံစံနဲ့ သေမယ်။ ဘယ်နေရာမှာ သေမယ်။ အဲဒီလိုပြောရင် စိတ်ကူးဖို့နေနေသာသာ အဲဒီလိုပြောတဲ့ ဗေဒင်ဆရာကို လက်သီးနဲ့ ထ, ထိုးမိမှာပဲ။

ထီမပေါက်သေးဖူး။ ထီပေါက်ရင် ဘာလုပ်မယ်ဆိုတဲ့ ကြိုတင်ပြင်ဆင်မှုတွေ စိတ်ထဲမှာ အများကြီးပဲ။

``သေ``ဖို့ ``သေချာ`` တဲ့ ကျွန်တော်တို့က မသေခင် ဘာလုပ်မယ် ဆိုတဲ့ ကြိုတင်ပြင်ဆင်မှု ဘာမှမရှိဘူး။ သေပြီးရင်လည်း ငါ… ဘာဖြစ်မယ်လို့ တစ်ခါမှ မစဉ်းစားမိကြဘူး။ သေပြီးတဲ့နောက် ဖြစ်လာမယ့် ဘဝတစ်ခုအတွက် အခုကတည်းက ဘာတွေလုပ်ထားသင့်တယ်ဆိုတာ မတွေးမိဘူး။ တွေးမိရင်လည်း လက်တွေ့ အကောင်အထည် မဖော်ဖြစ်ဘူး။

သေဖို့ကတော့ လုံးဝသေချာတယ်။ အခုလား.. နေ့လား… ညလား… မနက်ဖြန်လား…။ ဒါပေမဲ့ ဘယ်တော့မှ သေဖို့အတွက် ဘယ်တော့မှ မျှော်လင့်မထားဖူး။

ထီပေါက်ဖို့ကတော့ လုံးဝမသေချာဘူး။ ဒါပေမဲ့… လဆန်းတိုင်း ကိုယ်ထီပေါက်လိမ့်မယ်၊ ကိုယ်ထီပေါက်နိုင်တယ်လို့ အမြဲမျှော်လင့်ထားတက်ကြတယ်။

``မသေချာ``တဲ့ ​``ထီ`` နဲ့ ``သေချာ`` တဲ့ `` သေခြင်း`` ကို ယှဉ်ပြီး ကျွန်တော်တွေးမိနေခြင်းပါ။

``သေချာ` တဲ့ ``သေခြင်း`` အတွက် ဘာမှ မပြင်ဆင်ရသေးတဲ့ ကျွန်တော်ဟာ ``မသေချာ​`` တဲ့ ``ထီ`` အတွက် လတိုင်း လတိုင်း၊ ပြင်ဆင်နေမိတယ်။ လူတစ်ယောက်သေဆုံးသွားရင် သေသွားတယ်လို့ပဲ တွေးမိတယ်။ ``ငါလည်း… သေနိုင်တယ်`` လို့အထိ မတွေးမိဘူး။ လူတစ်ယောက် ထီပေါက်ရင်.. ထီပေါက်တယ်လို့ဆိုတဲ့ အတွေးမှာတင် ရပ်မနေပဲ ``ငါလည်း… ထီပေါက်နိုငတယ်`` လို့ အထိ တွေးမိတယ်။

သတင်းစာဖတ်တိုင်း နာရေးကြေငြာတွေမှာ ကျွန်တော်တို့နာမည် တစ်နေ့မဟုတ်တစ်နေ့ သေချာပေါက် ပါမယ်ဆိုတာ မတွေးမိကြပါဘူး။ ကိုယ့်မိတ်ဆွေ နာရေးကြာ်ငြာပါရင်တော့ သူတော့ သေသွားပြီ။ ငါ့အလှည် ဘယ်တော့လဲဆိုတာ ဆက်မတွေးမိဘူး။

သတင်းစာထဲက သိန်း (၁၀၀၀) ထီ ထွက်တဲ့နေ့ဆို ``ငါများဖြစ်လေမလား`` လို့ တွေးမိသူတွေချည်းပါပဲ။ ကိုယ့်မိတ်ဆွေတစ်ယောက်သာ ထီပေါက်ရင် နောက်တစ်ခါ ``ငါ့အလှည့်``လို့ ကျွန်တော်တို့ အမြဲတွေးမိကြတယ် မဟုတ်လား

**********************

``ထီပေါက်`` ဖို့ မျှော်လင့်သလို၊ ``ငါသေနိုင်တယ်``လို့လည်း မျှော်လင့်သင့်တယ်။

``ထီပေါက်ဖို့က မသေချာ`` ဖူးနော်…။

``ငါသေဖို့က သေချာ``တယ်…။

``ထီပေါက်ရင် ဘာလုပ်မယ်`` လို့ တွေးထားသလို….

``ငါသေရင် ဘာဖြစ်မယ်`` လို့ တွေးကြည့်စေချင်ပါတယ်…။

ကိုယ့်လက်ထဲမှာတော့ ထိုးထားတဲ့ ထီလက်မှတ်တွေ ကိုင်ပြီး ရင်ခုန်မျှော်လင့်နေကြတယ်။

ဒီလိုပါပဲ…

ကိုယ့်ဘဝထဲမှာတော့ ကိုယ်ကိုယ်တိုင် ပြုမူထားတဲ့ အကောင်းအဆိုး၊ အဖြူအမည်း။ ကုသိုလ်.. အကုသိုလ်တွေနဲ့….။

*****************

ဦးဘုန်း (ဓာတု)
မန္တလေး ။

ပန်းကန်ပြား တီးတဲ့အရူး

နေကလည်းပူလိုက်တာ။ အရေးထဲမှာ ဆိုင်ကယ်ကလည်း ဘီးပေါက်လိုက်သေးတယ်။

ကျွန်တော့်အိမ်က ကျွဲဆည်ကန်အရှေ့မှာပါ။ မွန်းလွဲ ၂ နာရီလောက်မှာ အိမ်ကထွက်ခဲ့တယ်။ နေပူပူလေပူပူအောက်မှာ ဆိုင်ကယ်ကိုဆင်းပြီးတွန်းရပါတော့တယ်။ ဆိုင်ကယ်ကို ဂီယာနံပါတ် ၀မ်းထည့်လိုက်တယ်။ လီဗာကို ဖြည်းဖြည်းလေးတင်ပြီး တွန်းလာခဲ့တယ်။

လေယာဉ်ကွင်းဟောင်းရှေ့မှာ ပန်းကန်ပြားတစ်ချပ်ကို အမြဲတီးနေတဲ့ အရူးတစ်ယောက်ရှိတယ်။ သူဟာ အမြဲတမ်းပဲ ကြေးပန်းကန်ပြားကို တုတ်တစ်ချောင်းနဲ့ တီးနေတက်တယ်။ ညစ်ပေနေတဲ့ ပ၀ါအနီကို အမြဲခြုံထားတက်တယ်။ သူ့အနားကို ကျွန်တော်ရောက်သွားတယ်။

``ငါကူပြီး တွန်းပေးမယ်``

``မလိုပါဘူး ရပါတယ်``

``ငါ ကူညီချင်လို့ကွ``

ဒီလိုနဲ့ ပန်းကန်ပြားတီးတဲ့ အရူးက ကျွန်တော့ဆိုင်ကယ်ကို လေထိုးကျွတ်ဖာဆိုင်ရောက်သည်အထိ တွန်းပေးပါတော့တယ်။ လေထိုးဆိုင်လည်းရောက်ရော သူက မပြန်သေးဘဲ ပန်းကန်ပြားကို ဆက်ပြီးတီးနေပါတယ်။ ကျွန်တော်က သူ့ကို ပိုက်ဆံ (၅၀၀) ကျပ်ထုတ်ပေးလိုက်ပါတယ်။ ဒီနေရာမှာသူနဲ့ ကျွန်တော်စကားတွေများခဲ့ကြတယ်။ စကားတွေပြောဖြစ်ခဲ့တယ်။ သူပြောတဲ့ စကားတွေက အရမ်းစိတ်ဝင်စားစရာကောင်းတယ်။

``ခင်ဗျားကို ကျွန်တော်မုန့်ဖိုးပေးတာ… ယူပါ``

``မင်း ငါ့ကို ပိုက်ဆံနဲ့ ဖျက်ဆီးတာလား။ လူတွေက တော်တော်ခက်တယ်။ ဒီပိုက်ဆံပဲကွ။ ဒီပိုက်ဆံကြောင့် လင်မယားတွေကွဲကြတယ်။ မိသားစုတွေ မုန်းကြတယ်။ ဒီပိုက်ဆံကြောင့် လူတွေပျက်စီးကြတယ်။ ဒီပိုက်ဆံကြောင့် စာရိတ္တတွေပျက်ကြတယ်။ ဂုဏ်သိက္ခာတွေကျတယ်။``

ကျွန်တော်အရမ်းအံ့သြသွားတယ်။ သူပြောတဲ့ စကားဟာ အဓိပ္ပာယ်တွေပါတယ်။ သူက ဆက်ပြောတယ်။

``လူတွေကတော်တော်ခက်တယ် ပိုက်ဆံရဖို့ အလုပ်လုပ်တယ်။ အလုပ်ကို လုပ်ချင်လို့ လုပ်နေကြတာ မဟုတ်ပါဘူး။ ပိုက်ဆံလိုချင်လို့ လုပ်နေကြတာ။ ဒါကြောင့် လူ့လောကကြီးပျက်စီနေတာ။ ငှက်တွေမှာ ပိုက်ဆံမလိုဘူး။ ဒါကြောင့် ငှက်တွေဟာ လူတွေလောက် ဒုက္ခမများဘူး။ လူတွေလောက်စာရိတ္တမပျက်ဘူး။ ပိုက်ဆံဆိုတာ ဒုက္ခရဲ့ နောက်ထပ်အဓိပ္ပာယ်တစ်မျိုးကွ``

သူက  ကျွန်တော့်ကို ပြောနေတာ မဟုတ်ဘူး။ အရူးသဘာဝအတိုင်း ပြောချင်ရာပြောနေတာ။ ကျွန်တော်က သူ့ကိုပိုက်ဆံ တစ်ထောင် ထုတ်ပေးလိုက်တယ်။

``ကဲဗျာ ဒါဆိုတစ်ထောင်ယူ။ ခင်ဗျားက ကျွန်တော့်ကို ကူညီတာဆိုတော့ ကျေးဇူးတင်လို့ပါ``

``အဲ့ဒါပဲ…  ဒါတွေကြောင့် ခက်တယ်ပြောတာ။ စေတနာဆိုတာ ပိုက်ဆံနဲ့ တန်ဖိုးဖြတ်လို့မရဘူး။ မင်း  ငါ့ကို မဖျက်ဆီးနဲ့။ ငါ့စေတနာကို မင်းတန်ဖိုးမဖြတ်နဲ့။ ငါက ဗိုက်ဆာနေတာ``

ကျွန်တော်လည်း လေထိုးကျွတ်ဖာဆိုင်အနီးက လက်ဖက်ရည်ဆိုင်ကို သွားလိုက်တယ်။ စားစရာလည်း ထူးထူးခြားခြား ဘာမှမတွေ့ဘူး။ ဒီလိုနဲ့ အဆင်သင့်ရှိတဲ့ ပေါက်စီ ကြော်နှစ်လုံးဝယ်လာလိုက်တယ်။

``ကဲ… ခင်ဗျား ဗိုက်ဆာရင် စား… ရော့``

သူက လိုလိုလားလားပဲ ပေါက်စီကြော်နှစ်ခုကို လှမ်းယူလိုက်တယ်။ ပေါက်စီကြော်ကို မစားသေးဘဲ သူ့ခေါင်းပေါ်မှာ လက်နှစ်ဖက်ကိုတင်ပြီးတစ်ခုခုကို ရွတ်ဖတ်နေတယ်။

``ဘာလုပ်နေတာလဲဗျ``

``သေသွားတဲ့ အဖေနဲ့ အမေကို ကျွေးနေတာ``

သူ့စကားတွေက တစ်မျိုးပဲ။ ဟုတ်တာပေါ့။ သူကက အရူးကိုး။ သူက စိတ်ဖောက်ပြန်နေတာကိုး။ သူဟာ ပေါက်စီကြော်နှစ်လုံးကို အားရပါးရစားနေပါတော့တယ်။

``ခင်ဗျား… ဒီ(၇၈)လမ်းပေါ်မှာ ဘာလုပ်နေတာတုန်း။ ခင်ဗျားကို ကျွန်တော်နေ့တိုင်းတွေ့တယ်။ ပန်းကန်ပြားကို အမြဲတီးတီးနေတာ ကျွန်တော်သတိထားမိတယ်။ ခင်ဗျား ဘယ်မှာနေတာလဲ``

``အဲ့ဒါပဲ ပေါက်စီကြော်ကျွေးပြီး လူကိုစပ်စုပြီ။ သူများအကြောင်း သိဖို့မကြိုးစားနဲ့။ ကိုယ့်အကြောင်းကို သိဖို့ ကြိုးစား။ လူမိုက်တွေဟာ သူများအကြောင်းကို စိတ်ဝင်စားတယ်။ လူလိမ္မာတွေက ကိုယ့်အကြောင်းကို ကိုယ်စိတ်ဝင်စားတယ်။ ကိုယ့်အမှားကိုယ်သိတယ်။ ကိုယ့်အမှားကိုယ် ပြုပြင်တယ်``

သူ့စကားက ကျွန်တော့်ရင်ကို လာပြီး မှန်ပါတယ်။

သူက ဆက်ပြောတယ်။

``ဒါ…. (၇၈) လမ်းမဟုတ်ဘူးကွ။ (၇၈)လမ်းက စစ်ကိုင်းလမ်းခွဲဓာတ်ဆီဆိုင်မှာ ဆုံးခဲ့ပြီ။ စစ်ကိုင်းလမ်းခွဲရဲ့ ဒီဘက်ကို ရန်ကုန်-မန္တလေး လမ်းလို့ခေါ်တယ်။ မသိရင်မှတ်ထား``

ကျွန်တော် ရေရေလည်လည်ခံလိုက်ရတယ်။ သူပြောတဲ့စကားတွေက မှန်နေတာကိုး ။ သူ့ကို စကားဆက်ပြောရင် စပ်စုတယ်လို့ ထင်ဦးမယ်။  ဒါကြောင့် ဘာမှ မပြောဘဲ သူပေါက်စီစားနေတာကို ကျွန်တော် စိုက်ကြည့်နေမိတယ်။

``ကျေးဇူးတင်တယ်လို့ မပြောတော့ဘူး။ ကျေးဇူးဆပ်နေရမှာစိုးလို့။ မင်းက ငါ့ကိုမုန့်ကျွေးတယ်။ ငါက မင်းကျွေးတာကိုစားတယ်။ မင်းကို ငါက ပြန်ကျွေးချင်မှ ကျွေးနိုင်မယ်။ ငါကမင်းကို ပြန်မကျွေးနိုင်ရင်လည်း မင်းက စိတ်မဆိုးနဲ့။ လူတွေကမျှော်ကိုးပြီး ကူညီချင်ယောင်ဆောင်ကြတာကွ``

သူပြောသမျှစကားတွေဟာ ကျွန်တော့်နားထဲမှာ အဆင်းတကြယ်ဖြစ်နေပါတယ်။ ဟုတ်တော့ဟုတ်တယ်။ ကျွန်တော်တို့ လူတွေကို ကူညီတယ်။ ပြီးတော့ တစ်ခုခု ပြန်တောင်းတယ်။ ရရင်ပျော်တယ်။ မရရင် မကျေနပ်ဘူး။

``စပ်စုတယ်… မထင်ပါနဲ့ဗျာ၊ ခင်ဗျားက တကယ်အရူးလား``

၏သူ့စကားတွေကြောင့် ကျွန်တော်က ဒီလိုမေးမိ လိုက်တာပါ။

ကျွန်တော့်စကားကိုလည်းကြားရော… တဟားဟားနဲ့ ရယ်ပါတော့တယ်။ အကြာကြီးကိုရယ်မောနေလိုက်တာ။

``ငါ့ကိုများ အရူးလားတဲ့၊ လူတိုင်းက အရူးပဲ ဥစ္စာ``

ကျွန်တော့်စကားနဲ့ ကျွန်တော်ခံလိုက်ရပြန်ပြီ။

သူက ကျွန်တော့်ကို မျက်ထောင့်နီကြီးနဲ့ ပြန်ပြီး စိုက်ကြည့်နေတယ်။ ကျွန်တော့်စိတ်ထဲမှာလည်း သူ့ကို စကးဆက်ပြီးပြောချင်နေတယ်။ သူဘာတွေ ပြောမလဲဆိုတာကို စိတ်ဝင်စားနေမိတယ်။

``ခင်ဗျား.. ဒီလေယာဉ်ကွင်းရှေ့မှာ ပန်းကန်ပြားကြီးကို တီး.. တီးပြီး ဘာလုပ်နေတာတုန်း``

``အချက်ပြနေတာဟေ့… အချက်ပြနေတာ``

``ဘာ အချက်ပြတာလဲဗျ``

``ဒီလမ်းက မန္တလေးမှာ လူတိုင်း သွားမယ့်လမ်း``

သူ့စကားကို ကျွန်တော်နားမလည်ဘူး။ သူက ဆက်ပြောတယ်။

``ငါ… မော်တော်ကားတွေကို ရေတွက်နေတာ``

``ဒီလောက်များတဲ့ကားတွေ ခင်ဗျားရေတွက်နိုင်လို့လား``

``ငါက.. အသုဘကားတွေကိုမှ ရွေးပြီးရေတွက်တာကွ။ နေ့တိုင်း အစီး ၅၀ လောက်ရှိတယ်``

 *****************

သူ့စကားကို စာဖတ်သူအား ဝေမျှလိုက်ပါတယ်။

စဉ်းစားကြည့်ရအောင်ဗျာ။

ရွှေမန္တလေးဂျာနယ်

အမှတ်(၂၈၆)၊ ၈.၁၁.၂၀၀၈။

ဦးဘုန်း (ဓာတု)
မန္တလေး။

ဒူးရင်းသီး ပုံပြင်

ရုပ်သေးပညာရှင် ဒေါ်မမနိုင်ရဲ့ ရုပ်သေးရုံမှာ တနင်္ဂနွေနေ့တိုင်း ``ဟက်ပီးဆန်းဒေး`` ကျင်းပတယ်။ သီချင်းတွေဆိုကြတယ်။ သီချင်းတွေက ရေဒီယိုသီချင်းဟောင်းတွေများပါတယ်။ မြို့မသီချင်းတွေကလည်း ပါတယ်။ သီချင်းလာပြီးဆိုကြတဲ့သူတွေလည်း မန္တလေးမြို့ရဲ့ မျက်နှာဖုံးတွေ များပါတယ်။ ပျော်စရာလည်း ကောင်းတယ်။ ကျွန်တော်တို့လို အသက်အရွယ်တွေအတွက် စိတ်ဖိစီးမှုသက်သာစေပါတယ်။ အလုပ်ထဲမှာ စိတ်တွေနစ်ပြီး တစ်ပတ်လုံး အလုပ်လုပ်ခဲ့သမျှ ``ဟက်ပီးဆန်းဒေး`` မှာ သီချင်းဆိုရင်း ဖွင့်ထုတ်ပစ်လိုက်တယ်။

ဒီလိုနဲ့ ကျွန်တော်တို့မှာ အချိန်တိုအတွင်း `` သူငယ်ချင်း`` တွေ အများကြီးတိုးလာပါတယ်။

ပြီးခဲ့တဲ့ ဝါဆိုလပြည့်နေ့က ဆရာမရုပ်သေး ပညာရှင် ဒေါ်မမနိုင်ရယ်၊ စာရေးဆရာမယဉ်ယဉ်နုရယ်၊ စာရေးဆရာမ သင်းသင်းရယ်၊ စာရေးဆရာမ ခင်လေးငယ်ရယ်၊ စာရေးဆရာ ဦးရာစိုးရယ် ၊ ကျွန်တော်ရယ်၊ မန္တလေး ကန်တော်ကြီးရဲ့ ပြည်ကြီးမွန်ဖောင်တော်မှာ နံနက်စာစားရင်း စကားပြောဖြစ်ကြတယ်။

အဲဒီနေ့မှာ ``သူငယ်ချင်း``ဆိုတဲ့ အဓိပ္ပာယ်ကို ပေါ်လွင်စေတဲ့ ``ဒူးရင်းသီး``ပုံပြင်ကိုကျွန်တော်ပြောဖြစ်ခဲ့တယ်။

ပုံပြင်လေးက ဒီလိုပါ။

*******

တစ်ခါတုန်းကပေါ့……။

သူငယ်ချင်း အယောက် (၃၀)ဟာ အုပ်ချုပ်သူ ဆရာ၊ ဆရာမတွေနဲ့အတူ တောစပ်တစ်နေရာကို လေ့လာရေး ခရီးထွက်ခဲ့ကြတယ်။ သူငယ်ချင်းတွေဆိုတော့ .. ဆော့ကြတာပေါ့။ ပတ်ဝန်းကျင်ကိုလည်း လေ့လာကြတယ်။ ပန်းပင်တွေအကြောင်း သစ်ပင်တွေအကြောင်း၊ လိပ်ပြာလေးတွေအကြောင်းပြောကြတယ်။ ပါဆယ်ဂိမ်းကစားကြတယ်။ ပါလာတဲ့ ထမင်းဘူးတွေ ဖွင့်စားကြတယ်။ ဒီ သူငယ်ချင်းတွေထဲက သူငယ်ချင်းသုံးယောက်ဟာ လှပတဲ့ လိပ်ပြာလေးတွေကို လိုက်ပြီးကြည့်ရင်း တောစပ်ကနေ တောထဲကိုရောက်သွားပါတော့တယ်။ လိပ်ပြာလေးတွေလည်း လှတော့.. လိပ်ပြာလေးတွေထဲပဲ စိတ်ကရောက်နေတယ်။ ကိုယ်လာတဲ့လမ်းကို မမှတ်မိတော့ဘူး။ ဒီလိုနဲ့ ညနေစောင်းလို့ စုရပ်ကိုပြန်ကြမယ်လည်းလုပ်ရော မပြန်တက်ကြတော့ဘူး။ သူငယ်ချင်း  သုံးယောက်ဟာ ထင်ရာမြင်ရာ စမ်းမှန်းပြီး စုရပ်ကို ပြန်လာကြတယ်။

သူတို့လာတဲ့လမ်းဟာ စုရပ်ကို မရောက်ဘဲ တောနက်ထဲကိုပဲ တဖြည်းဖြည်းရောက်သွားပါတော့တယ်။

ညနေခင်းရောက်လာတော့ တဖြည်းဖြည်း မှောင်လာတယ်။ သူငယ်ချင်းသုံးယောက် တစ်ယောက်လက်ကို တစ်ယောက်တွဲလို့လမ်းရှာရင်း ခရီးဆက်ခဲ့ပါတော့မယ်။

ညဟာ တော်တော်ကို မှောင်လာတယ်။ အဲ့ဒီအချိန်မှာ မီးတုတ်တွေကိုင်လို့ လူတစ်စုကို သူတို့မြင်လိုက်တယ်။ သူတို့ကိုလိုက်ရှာနေတဲ့ အဖွဲ့ဖြစ်မယ်ထင်တယ်။ အနီးနား လည်းရောက်ရော အဲ့ဒီလူစုဟာ လိုက်ရှာနေတဲ့သူတွေ မဟုတ်ဘဲ လူရိုင်းတွေဖြစ်နေတယ်။ လူရိုင်းတွေဟာ သူတို့ကို တွေ့တွေ့ချင်းပဲ နွယ်ကြိုးတွေနဲ့တုပ်လိုက်တယ်။ ခြေထောက်နဲ့ ကန်တယ်။ သူတို့နားမလည်တဲ့စကားတွေနဲ့ သူတို့ကို ပြောတယ်။ ဖမ်းသွားကြတယ်ပေါ့။

ဒီလိုနဲ့ တစ်ညလုံးလမ်းလျှောက်လိုက်ရတာ မိုးလင်းသွားရောဆိုပါတော့။ မိုးလင်းတော့လည်း ဆက်ပြီး  လျှောက်ရပြန်တယ်။ လမ်းမှာတွေ့တဲ့ အသီးတွေကိုခူးစား။ တွေ့တဲ့ရေကိုသောက်။ ခရီးဆက်လိုက်တာ နှစ်ညအိပ်လောက်ကြာမှာလူရိုင်းတွေနေတဲ့ ရွာကိုရောက်ပါတော့တယ်။

ရွာကိုလည်းရောက်ရော  ရွာလူကြီးလို့ထင်ရတဲ့ ပုဂ္ဂိုလ်ကြီးက အဲ့ဒီ သူငယ်ချင်းသုံးယောက်ကို လှံကြီးနဲ့ရွယ်တယ်။ ချိန်တယ်၊ သတ်ပစ်မယ်ပေါ့။ အဲဒီအချိန်မှာ ``လူ`` စကားနည်းနည်းပြောတက်တဲ့ စကားပြန် တစ်ယောက် ရောက်လာတယ်။

``ငါတို့ လူကြီးကပြောတယ်။ ငါတို့ရွာမှာ လူတစ်ယောက်ရဲ့ ကံကြမ္မာကို စမ်းသပ်တဲ့နည်းရှိတယ်။ ကံကောင်းရင် အသက်ရှင်မယ်။ ကံဆိုးရင်  အသက်သေမယ်။ စမ်းသပ်တဲ့နည်းကလည်း မခက်ဘူး။ ဟိုမယ်.. တွေ့လား။ ဥယျဉ်ခြံထဲမှာ သစ်သီးပင်တွေ စိုက်ထားတယ်။ အဲ့ဒီ သစ်သီးပင်တွေထဲက အမျိုးအစားတူတဲ့ သစ်သီး (၁၀)လုံးခူးခဲ့ရမယ်။ မင်းတို့ခူးခဲ့တဲ့ သစ်သီးပေါ်မူတည်ပြီး မင်းတို့ရဲ့ အသက်နဲ့ ကံကြမ္မာကိုဆုံးဖြတ်မယ်။ ကဲ မင်းတို့သုံးယောက်နှစ်သက်ရာ အမျိုးအစားတူ သစ်သီး(၁၀)လုံးစီခူးခဲ့၊ သွားကြ``

သူငယ်ချင်းသုံးယောက်ဟာ ဥယျာဉ်ခြံထဲကို အပြေးအလွှားပဲ သွားကြပါတယ်။

ပထမဆုံးတစ်ယောက်က ပန်းသီး(၁၀)လုံး ခူးလာတယ်။ စကားပြန်ကပြောတယ်။

``အဲ့ဒီ ပန်းသီး(၁၀) လုံးကို အသံမထွက်ဘဲ အလုံးလိုက်မျိုချရမယ်။ အသံထွက်ရင် သတ်မယ်၊ အသံမထွက်ရင် အသက်ရှင်မယ်``

စဉ်းစားကြည့်ကြစမ်းပါဗျ။ ပန်းသီး(၁၀)လုံး။ အလုံးလိုက် ဘယ်လိုလုပ်မျိုနိုင်မှာလဲ။ ဒီလိုနဲ့ အသတ်ခံရရောဆိုပါတော့။ အသက်ထွက်ထွက်ချင်းပဲ သူဟာ ငရဲပြည်ကို ရောက်သွားပါတော့တယ်။

အဲ့ဒီအချိန်မှာ ဒုတိယသူငယ်ချင်းက စပျစ်သီး (၁၀)လုံးခူးပြီးရောက်လာတယ်။ ထုံးစံအတိုင်းပဲ စကားပြန်ကပြောတယ်။

``စပျစ်သီး ၉၁၀)လုံးကို အသံမထွက်ဘဲ အလုံးလိုက်မျိုချရမယ်။ အသံထွက်ရင်သတ်မယ်။ အသံမထွက်ရင် မင်းအသက်ရှင်မယ်``

စပျစ်သီးဆိုတာသေးသေးလေးတွေဆိုတော့ တစ်လုံးပြီးတစ်လုံး အသံမထွက်ဘဲ မျိုချပါတော့မယ်။ ဒီလိုနဲ့ (၉)လုံးမြောက်အရောက်မှာ အသံထွက်ပြီး ``ရယ်`` လိုက်တယ်။ အဲ့ဒါနဲ့ အသတ်ခံရပါလောရော။ ဒီကောင်လည်း ချက်ချင်း ဆိုသလိုပဲ ငရဲပြည်ကိုရောက်သွားတယ်။

ငရဲပြည်မှာ သူငယ်ချင်းနှစ်ယောက်တွေ့ကြတော့.. ပထမ သူငယ်ချင်းက မေးတယ်။

`ဟေ့ကောင် မင်းဘာအသီးစားလို့ အသတ်ခံရတာလဲကွ``

``စပျစ်သီးကွ`

``ဟ.. စပျစ်သီး (၁၀)လုံးများ အသံထွက်အောင် စားရတယ်လို့ကွ။ ငါကတော့ .. ပန်းသီးမို့ အသတ်ခံရတာ။ အံ့သြပါ့ကွ``

``မင်းဘာသိလို့လဲ။ ငါက.. စပျစ်သီးကို အသံမထွက်ဘဲ ကြိတ်မှိတ်ပြီးမျိုချနေတုန်း ဟိုအကောင် ဘာအသီးတွေခူးပြီး ပြေးလာတယ်မှတ်တုန်း သူ့ကိုကြည့်ပြီး ငါအသံထွက် ``ရယ်``မိလို့ အသတ်ခံရတာ``

``ဒီကောင်က.. ဘာအသီး (၁၀)လုံး ခူးလာလို့တုံးကွ``

``ဒူးရင်းသီး (၁၀)လုံး ခူးလာတယ်တဲ့ကွာ``

ငရဲပြည်ရောက် သူငယ်ချင်း နှစ်ယောက် တဟားဟားနဲ့ ရယ်လိုက်ကြတော့တယ်။

အဲ့ဒီအချိန်မှာ တတိယသူငယ်ချင်း ငရဲပြည်ကိုရောက်လာတယ်။

``မင်းတို့ကမှ မင်းတို့ခူးလာတဲ့အသီး စားခွင့်ရသေးတယ်။ ငါကတော့ ငါခူးလာတဲ့အသီး မစားရဘဲ အသတ်ခံရတာကွ``

သူငယ်ချင်းသုံးယောက် ငရဲပြည်မှာ ပျော်ပျော်ပါးပါးကြီး ရယ်မော်လိုက်ကြပါတော့တယ်။

*******

သူငယ်ချင်းဆိုတာာ ဒီလိုမျိုးပါ။

ပန်းသီးပဲ စားရစားရ၊ စပျစ်သီးပဲ စားရစားရ၊ ဒူးရင်းသီးပဲ စားရစားရ ဘယ်ဘဝပဲရောက်ရောက်၊ ဘယ်အခြေအနေပဲရောက်ရောက်၊ ဘယ်လိုစည်းစိမ်တွေကို ပိုင်ဆိုင်ပိုင်ဆိုင် သူငယ်ချင်းဆိုတာသူငယ်ချင်းပဲ ဖြစ်သင့်တယ်။ သူငယ်ချင်းတွေ အကြားမှာ ဂုဏ်တွေ၊ အရှိန်အဝါတွေ၊ အောင်မြင်မှုတွေ၊ ပိုင်ဆိုင်မှုတွေနဲ့ စည်းခြားမထားသင့်ဘူး။ အားလုံး ပျော်ပျော်ပဲပေါ့ဗျာ။

ကျွန်တော့်ပုံပြင်ကို သူတို့နားထောင်ကြရင်း တဝါးဝါး၊ တဟားဟားနဲ့ ရယ်မောကြပြီး နံနက်စာ စားလိုက်ကြပါတော့တယ်။

တကယ်တော့.. သူငယ်ချင်းဆိုတာ…

ရင်ဖွင့်ဖော် ရင်ဖွင့်ဖတ်၊ ပျော်ဖော်ပျော်ဖက်၊ ချစ်ဖော်ချစ်ဖက်၊ စိတ်ရဲ့ချမ်းသာမှုကို အမျိုးမျိုးပုံဖော်ပေးနိုင်တဲ့ သဘာဝက  ဖန်တီးထားတဲ့ လူသားတွေပဲ မဟုတ်ပါလားခင်ဗျာ…။

ဒီ ဒူးရင်းသီး ပုံပြင် လေးက တော့ ``တွင်း`` ဆိုသော စာအုပ်မှ ခေါင်းစဉ်လေး ဖြစ်ပါတယ်။ အွန်လိုင်းမှ စာဖတ်ပရိသတ်တွေအတွက် ပြန်လည် ဖော်ပြပေးလိုက်ရခြင်းဖြစ်ပါတယ်။

ဦးဘုန်း(ဓာတု)
မန္တလေး။

``တွင်း``

ကိုယ်ချင်းလည်း မစာဘူး။

သူတို့တုန်းကတော့ နေချင်သလိုနေပြီး

ငါတို့ကျမှ ဟိုလို မနေနဲ့။ ဒီလိုမနေနဲ့။

ဟိုလိုလေး လုပ်ကြည့်ပါလား။

ဒီလိုလုပ်တာ မှားတယ်။

တော်တော်ကို ကိုယ်ချင်းမစာကြတဲ့ လူကြီးတွေပဲ။

************

``ဒီအရွယ်မှာ ရည်စားမထားရဘူးနော်``

သူတို့တုန်းကတော့ထားခဲ့ကြတယ်။

ကျွန်တော်တို့ကျမှ မထားနဲ့တဲ့ဗျာ။

``မပျင်းကြနဲ့။ ပျင်းရင် ပညာမရဘူး``

သူတို့လည်း ကျွန်တော်တို့အရွယ်တုန်းက ပျင်းခဲ့ကြတာပဲ မဟုတ်လား။

``ပိုက်ဆံစုကြ၊ မဖြုန်းကြနဲ့``

တော်တော် အပြောကောင်းတယ်။ သူတို့ ပိုက်ဆံမစုခဲ့ကြလို့။ ငွေတွေကိုဖြုန်းတီးခဲ့ကြလို့ ကျွန်တော်တို့ ဒီလိုနေနေကြရတာ မဟုတ်ဘူးလား။

``အရက်မသောက်နဲ့ ငါ့သား``

အဖေ့ပါးစပ်မှာ အရက်နံ့တွေနဲ့။ ကျွန်တော့်ကို လာပြီး ဆုံးမနေတယ်။

``ဆေးလိပ်သောက်တာ မကောင်းဘူး``

သူ့အိတ်ထောင်ထဲမှာ စီးကရက်ဘူးကြီးနဲ့။ ဆေးလိပ်မကောင်းကြောင်းတရားလာပြီးဟောတယ်။ ရယ်စရာကောင်းလိုက်တာ။

``မနေနိုင်ရင် ကွန်ဒုံးသုံးကြနော်``

လာလာချည်သေး။ လူကြီးတွေက လူငယ်တွေကို ဆုံးမကြတယ်။

လူငယ်တွေရဲ့ ရင်ထဲမှာ``စောဒက``တွေ အများကြီးပဲ လူကြီးတွေရဲ့ ဆုံးမစကားကို တစ်ဖက်သက် ပြောတယ်လို့မြင်ကြတယ်။ ကိုယ်ချင်းမစာဘူးလို့လည်း ခံစားကြတယ်။ သူတို့လုပ်ချင်ရာလုပ်ခဲ့ပြီးမှ ငါတို့အလှည့်မှာ လုပ်ချင်ရာ လုပ်ခွင့်မပေးဘူး။ မတရား ဘူး။

ဒီလို လူငယ်တွေအတွက် ကျွန်တော် ပုံပြင်လေးတစ်ပုဒ်လောက် ပြောပြပါရစေ။

 **********

တစ်ခါတုန်းကပေါ့…။ ရတနာသိုက်ရှိတယ်လို့ နာမည်ကြီးနေတဲ့ ဒေသ တစ်ခုရှိတယ်။  အဲဒီသေမှာ ရတနာတွေကို လိုက်ပြီးရှာကြတဲ့ ရတနာမုဆိုးတွေ လည်းရှိတယ်။ တစ်ရက်မှာ မိုးကြီးလေကြီးကျပါလေရော။ မိုးတွေကလလည်း သဲသဲမည်းမည်းရွာတယ်။ ချောင်းရေတွေ ဒလဟောစီးလို့ မြေတွေပြိုတယ်။ သစ်ပင်တွေ လဲတယ်။ အဲ့ဒီအခါမှာ တောစပ်တစ်ခုရဲ့ ချောင်းနံဘေးမှာ ရေတွင်းဟောင်းကြီးတစ်ခု ပေါ်လာတယ်။ အဲ့ဒီတွင်းရဲ့ နှုတ်ခမ်းဝမှာ လူတွေဝိုင်းအုံပြီး တွင်းထဲကိုစိုက်ပြီး ကြည့်နေကြတယ်။

``ဟာ… တွင်းထဲမှာ လက်လက်လက်လက်နဲ့ ရွှေတွေဖြစ်မယ်ကွ``

``မဟုတ်ဘူး၊ ပတ္တမြားခဲတွေ နေမှာပါ``

``ငါကတော့ စိန်ရောင်တွေတောက်နေတယ် ထင်တာပဲ``

``မဟုတ်ဘူးကွ၊ ရှေးဟောင်း ရတနာသိုက် တွေ့ပြီကွ``

တွင်းနှုတ်ခမ်းဝမှာ ဝိုင်းအုံပြီးကြည့်နေကြတဲ့ လူတွေအားလုံးဟာ တစ်ယောက်တစ်ပေါက်ပြောနေကြတယ်။ အားလုံးဟာလည်း ``လောဘ`` မျက်လုံးတွေ ကိုယ်စီနဲ့ပေါ့။

အဲဒီအချိန်မှာ လူတစ်ယောက်က ပြောပြောဆိုဆို တွင်းထဲကို ခုန်းဆင်းမယ်လုပ်တယ်။

``ဟိတ်ကောင်.. မင်းမဆင်းနဲ့၊ ငါ အရင်ဆင်းမယ်။ ငါအရင်.. ရောက်တာကွ``

``ဘယ်ရမလဲ၊ ဒီလိုဆိုရင် ငါအရင် ဆင်းရမှာကွ``

``ဒီတွင်းပေါက်ဝကို မင်းထက်ငါအရင် ရောက်တာလေ``

ဘာမပြော ၊ ညာမပြောနဲ့ လူတစ်ယောက်ဟာ တွင်းထဲကို ``ဝုန်းခနဲ`` ခုန်ဆင်းလိုက်ပါတော့တယ်။

တွင်းအောက်ခြေကိုလည်းရောက်ရော… လင်းလက်နေတဲ့အရာတွေဟာ ရွှေတွေလည်းမဟုတ်ဘူး။ ပတ္တမြားတွေလည်းမဟုတ်ဘူး။ စိန်တွေလည်းမဟုတ်ဘူး။ မိုးရွာလို့မြေပြိုပြီး တွင်းထဲမှာရှိတဲ့ မြွေပွေးတွေ၊ မြွေဟောက်တွေ၊ အကောင်တွေ ပေါက်နေကြတာ။ ``မြွေပွေး၊ မြွေဟောက်`` အကောင်ပေါက်တွေရဲ့ ``မျက်လုံး`` တွေအရောင်တောက်နေတာသာဖြစ်တယ်။ တွင်းထဲကို ရောက်နေတဲ့သူက တွင်းအပေါ်ကိုအော်ပြီး ပြောလိုက်တယ်။

``ဟိတ်ကောင်တွေ.. ဆင်းမလာကြနဲ့။ ရွှေတွေ၊ စိန်တွေမဟုတ်ဘူးကွ။ ``မြွေပွေး``တွေရဲ့မျက်လုံးတွေ။ ``မြွေဟောက်`` တွေရဲ့မျက်လုံးတွေ၊ သူတို့မျက်လုံး တွေရဲ့ အရောင်တွေကို ငါတို့က ``စိန်`` တွေထင်နေတာ။ ရွှေတွေ ထင်နေတာ။ ပတ္တမြားတွေ ထင်နေတာ။ ငါတို့ထင်သလို မဟုတ်ဘူးကွ။ တွင်းထဲကိုဆင်းမလာကြနဲ့။ ငါကိုတော့ မြွေကိုက်ကုန်ပြီ။ မင်းတို့ဆင်းမလာကြနဲ့``

တွင်းနှုတ်ခမ်းဝက လူတွေက မယုံကြဘူး။ ဒီကောင် တစ်ယောက်တည်းလိုချင်လို့ လိမ်ပြောတာပဲဖြစ်မယ်။ နောက်တစ်ယောက် ထပ်ခုန်ချလိုက်တယ်။

``ဟုတ်တယ်ဟေ့၊ ဆင်းမလာကြနဲ့ စိန်​တွေမဟုတ်ဘူး။ ရတနာတွေလည်း မဟုတ်ဘူး။ သူပြောတာမှန်တယ်ကွ၊ ဒီကောင်သေနေပြီ။ ငါ့ကိုလည်း မြွေတွေက ဝိုင်းပြီး ပေါက်ကုန်ပြီ။ ``မြွေ``တွေရဲ့ မျက်လုံးတွေက။ သူတို့ရဲ့ မျက်လုံးတွေကို ငါတို့က ရတနာတွေလို့ ထင်နေတာ။ မင်းတို့ တွင်းထဲကို ဆင်းမလာကြနဲ့။ အားလုံးသေကုန်ကြလိမ့်မယ်``

တွင်းနှုတ်ခမ်းဝက လူတွေအားလုံးဟာ တွင်းထဲက လူတွေပြောတဲ့စကားကို မယုံကြဘူး။ ဒီနှစ်ကောင် အပိုင်စီးချင်လို့`` လီဆယ်``ပြီးတော့ ပြောတယ်လို့ပဲ ထင်နေကြတယ်။

ဒီလိုနဲ့……

တစ်ယောက်ပြီးတစ်ယောက် ခုန်ဆင်းလိုက်ကြတာ။ တွင်းနှုတ်ခမ်းဝက လူတွေ အကုန်လုံးတွင်းထဲမှာ သေကုန်ကြတော့တယ်။

*******

လူကြီးဆိုတာ…

မြွေတွေရဲ့ အရောင်တောက်နေတဲ့ မျက်လုံးတွေကို ``စိန်`` တွေမှတ်ပြီး၊ ရတနာတွေမှတ်ပြီး၊ တွင်းအနက်ထဲကို ခုန်ဆင်းခဲ့ဖူးတဲ့သူတွေ။

သူတို့က မြွေအကိုက်ခံရပြီးမှ  တွင်းနက်ထဲကနေ အော်ပြောတဲ့ စကားဖြစ်တယ်။

ဒါကြောင့် ခုန်မဆင်းနဲ့လို့ ပြောတာ။

လူငယ်တွေက မယုံကြည်ဘူး။

ဒီတော့ ခုန်ဆင်းကြဦးမယ်ပေါ့။

*******

လူငယ်၊ လူလတ်၊ လူကြီးကို ဘယ်လိုအဓိပ္ပာယ် သတ်မှတ်သင့်သလဲ။

ကျွန်တော်ကတော့ ဒီလို အဓိပ္ပာယ်ဖွင့်ချင်တယ်ဗျာ။

မသိလို့လုပ်လိုက်မိတဲ့ အမှား၊ မှန်တယ်ထင်လို့ လုပ်လိုက်မိတဲ့အမှား၊ အမှားတွေကို အမှန်ဖြစ်အောင် ကြိုးစားရင်း ထပ်ပြီးမှားသွားမိတဲ့အမှား၊ မှားမှန်းသိရဲ့နဲ့ မထူးပါဘူးဆိုပြီး ဇွတ်တိုးပြီး မှားမိတဲ့အမှား.. အဲဒီအမှား တွေကို ရင်မှာပိုက်ပြီး 

အမှားများစွာဖြင့် နောင်တ တရားများနဲ့ ရှင်သန်နေထိုင်သူကို လူကြီးဟုခေါ်သည်။

အမှားကို အမှားမှန်းမသိဘဲ အမှားကို အမှန်ထင်ပြီး အဲ့ဒီအမှားတွေနဲ့ ပျော်ရွှင်ကျေနပ်နေသူများကို လူလတ်ဟုခေါ်သည်။

အမှားများကို မှားရန်အတွက် ကြိုးစားပမ်းစား လိုက်လံရှာဖွေနေသူများအား လူငယ်ဟုခေါ်သည်။

ဒီတော့ …..

နောင်တနဲ့ ရင်းပြီး၊ အမှားနဲ့ရင်းပြီး ရထားတဲ့ ဘဝသင်ခန်းစာတွေကို လူငယ်တွေအတွက် မမှားဖို့လိုက်နာဖို့၊ ရှောင်ကြဉ်ဖို့၊ သတိပြုဖို့၊ ပြောကြားတာကို လူငယ်တွေ နားလည်သင့်တယ်။

တကယ်တော့…

အရောင်တောက်ပနေတဲ့ မြွေတွေရဲ့မျက်လုံးတွေကို စိန်ရွှေအမှတ်နဲ့ အရယူဖို့ကြိုးစားရင်း၊ ဆုံးရှုံးမှုတွေ၊ နောင်တတွေ၊ မျက်ရည်တွေ၊ ဆင်းရဲခြင်းတွေ၊ ခံစားချက်တွေနဲ့ရင်းလို့ သိလာခဲ့ရတဲ့ လူကြီးတွေရဲ့ ဆုံးမစကားကို လူငယ်လေးတွေ နားလည်စေချင်လို့ ဒီပုံပြင်လေးနဲ့ ပြောပြလိုက်ပါတယ်။

မယုံရင် တွင်းထဲ ကိုခုန်ဆင်းလိုက်။

ရွှေမန္တလေးဂျာနယ်

အမှတ်စဉ်(၂၆၅)၊ ၉.၆.၂၀၀၈။

``တွင်း`` စာအုပ်မှ ကောက်နှုတ်ဖော်ပြသည်။

ဦးဘုန်း(ဓာတု)
မန္တလေး။

အတ္တဥခွံ

အတ္တဆိုတာ ``အရွေ့`` တစ်မျိုးဖြစ်တယ်။

ဒါနဲ့ပတ်သက်လို့ ကျွန်တော်ကိုယ်တိုင်တွေ့ကြုံတဲ့ ဖြစ်ရပ်လေးပြောပြပါရစေ။ ဒီဖြစ်ရပ်ကြောင့် ကျွန်တော်ရဲ့ အတ္တစိတ်ကို ကျွန်တော်ပြန်ကြည့်တက်တဲ့ အလေ့အကျင့် ရလာခဲ့တယ်။ ဒီဖြစ်ရပ်ကြောင့် ကျွန်တော့်ရင်ထဲက အတ္တစိတ်ဆိုတဲ့ ``အကောင်`` ဥခွံထဲက ပေါက်ထွက်လာတာ သတိပြုမိတက်လာတယ်။

********

 လွန်ခဲ့တဲ့ ငါးနှစ်လောက်တုန်းကပေါ့။

နယ်မြို့လေးတစ်မြို့ကို ကျွန်တော် စာသွားသင်ဖြစ်တယ်။ အိမ်တစ်အိမ် မီးလောင်တာကို အစအဆုံး ကျွန်တော် မြင်တွေ့ခွင့်ရခဲ့တယ်။ အဲ့ဒီဖြစ်ရပ်ကိုစာဖွဲ့ပြပါရစေ။

အဲဒီအိမ်ဟာ မြို့ရဲ့အချက်အချာကျတဲ့နေရာမှာရှိတယ်။ မြေကွက်လပ်ကလည်း အကျယ်ကြီးပဲ။ တိုက်အိမ်ဆောက်ထားတာလည်း မကြာသေးဘူး။ ဒီမြို့မှာတော့ အဲဒီတိုက်အိမ်က အသားနားဆုံးပဲ။ အိမ်ပိုင်ရှင်မှာ သားသုံးယောက်နဲ့ သမီးတစ်ယောက်ရှိတယ်။ သားအကြီးဆုံးက အဲဒီအိမ်မှာပဲ ကျူရှင်ဖွင့်ထားတယ်။ ဓာတုဗေဒဘာသာရပ် အနီးကပ်ပို့ချပေးဖို့ ကျွန်တော့်ကိုဖိတ်ကြားလို့ ကျွန်တော်ရောက်သွားခဲ့တယ်။ ကျွန်တော်ရောက်တဲ့နေ့မှာပဲ အိမ်ပိုင်ရှင်အဖေကြီးက မန္တလေးမြို့ကို ဈေးဝယ်သွားထွက်သွားတယ်။

သူတို့နေတဲ့အိမ်ဟာ မြို့လယ်ဈေးနဲ့ မလှမ်းမကမ်းမှာရှိတော့ သောက်ရေသန့်ကုမ္မဏီတစ်ခုက အဲ့ဒီအိမ်ကို ဝယ်ချင်တယ်။ ပေါက်ဈေးထက် နှစ်ဆပေးတယ်။ အိမ်ပိုင်ရှင် အဖေကြီးက မရောင်းဘူး။ သားတွေက ရောင်းချင်တယ်။ သူ့အဖေက ခရီးမထွက်ခင်မှာ ပြောသွားတယ်။ ဒီအိမ်နဲ့မြေကို ပေါက်ဈေးထက်သုံးဆရရင် ရောင်းမယ်တဲ့။

ကျွန်တော်က အဲဒီ့မြို့မှာ သုံးညအိပ်ပြီး စာသင်ဖို့ ပြင်ဆင်လာတယ်။ ကျွန်တော်ရောက်ပြီး နှစ်ရက်အကြာမှာ အဲဒီအိမ်ကြီးမီးလောင်တော့တယ်။ ဖြစ်ချင်တော့အိမ်ပိုင်ရှင် အဖေကြီးက မန္တလေးက ခရီးရောက်မဆိုက် ပြန်လာတဲ့ အချိန်ဖြစ်နေတယ်။

နယ်မြို့လေးဆိုတော့ မီးလောင်တဲ့အခါ ရရာ ရေပုံးတွေနဲ့ ပက်ကြတယ်။ မီးကိုငြိမ်းသတ်ဖို့ကြိုးစားကြတယ်။ အိမ်ပိုင်ရှင်အဖေကြီးလည်း ပျာယာကိုခတ်လို့။ ကျွန်တော်လည်း တွေ့တဲ့ရေပုံးတစ်ပုံးကိုဆွဲပြီး မီးလောင်နေတဲ့အိမ်ကြီးကို ရေနဲ့ငြှိမ်းသတ်ပေးခဲ့ရတယ်။ ရေတွေလည်း ရွှဲလို့၊ ရွံ့တွေလည်း ပေပွလို့ပေ့ါ။

``ငါ့အိမ်မီးလောင်နေပြီ။ ငြိမ်းကြပါဟ၊ လုပ်ကြလေ။ ဘာလို့ ငါ့အိမ်မီးလောင်တာကို ဝိုင်းကြည့်နေကြတာတုန်း``

အဲဒီအချိန်မှာ ကျွန်တော်တွေးမိတယ်။ ဒီအိမ်ကိုသာ သူခရီးမထွက်ခင်က ရောင်းသွားခဲ့ရင် ဒီလို သောကမျိုး၊ ဒုက္ခမျိုးဖြစ်မှာ မဟုတ်ဘူး။ အခုတော့ သူ့အိမ်ကြီး မီးလောင်နေတာ သူ့ကိုလောင်နေသလိုပဲလို့ ကျွန်တော်ခံစားနေမိတယ်။ အဲဒီအချိန်မှာ သားအကြီးက သူ့အဖေနားကို ကပ်လာတယ်။

``အဖေ…. စိတ်မပူနဲ့အဖေ။ ဒီအိမ်ကိုပေါက်ဈေးထက် သုံးဆပေးမယ်လို့မနေ့ကပဲ ကျွန်တော် အရောင်းအဝယ်စာချုပ် ချုပ်ထားပြီးပြီ အဖေရ။ အဖေစိတ်ကို  အေးအေးထားပါ။ ဒါအဖေ့အိမ်မဟုတ်တော့ဘူး``

ချက်ချင်းဆိုသလိုပဲ။ ဒီလူကြီးရဲ့မျက်နှာမှာ သောကတွေပျောက်သွားတာ တွေ့လိုက်ရတယ်။ ရင်ထဲမှာ ပူလောင်မှုတွေ ငြိမ်းသွားတာ တွေ့ရတယ်။ မီးလောင်တာကို ဝိုင်းကြည့်နေတဲ့ လူတွေထဲကလူတစ်ယောက်လိုပဲ သူ့မျက်နှာဟာ ချက်ချင်းဖြစ်သွားတယ်။ ငါ့အိမ်ကို မီးလောင်နေတာ မဟုတ်ဘူးလို့ ခံစားချက်ချက်ချင်းဖြစ်သွားတယ်။

အဲဒီအချိန်မှာ ဒုတိယသားက သူ့အဖေကို ဝင်ပြောတယ်။

``အဖေရေ… အရောင်းအဝယ်စာချုပ်သာချုပ်ထားတာ။ စရန်ကလည်း နည်းနည်းလေးပဲ ပေးထားသေးတာ။ မဝယ်တော့ဘူးဆိုရင် ဘယ်လိုလုပ်မလဲ ။ ကျွန်တော့်အထင်တော့ စရံအဆုံးခံမယ်ထင်တယ်``

သားအလတ်ရဲ့စကားကိုလည်းကြားရော အဲ့ဒီ အဖေကြီးဟာ ချက်ချင်းပဲ ပျာယာခတ်သွားပြန်တယ်။ ငါ့အိမ်ကို မီးလောင်နေတယ်လို့ ခံစားသွားရပြန်တယ်။

``လုပ်ကြပါဟ… ငြှိမ်းကြပါဟ။ ဘာလို့ ဝိုင်းကြည့်နေကြတာလဲ။ ကူညီကြပါဦး။ ငါ့အိမ်ကြီး မီးလောင်နေပြီ။ ဝိုင်းကြပါ။ ပက်ကြပါ``

အဲဒီအချိန်မှာ တတိယသားက အဝေးကနေပြီး သူ့အဖေဆီကို ပြေးလာတယ်။ ပြီးတော့ သူ့ဖေကို ဒီလိုပြောတယ်။

``အဖေရေ… အဲဒီကုမ္မဏီက မန်နေဂျာနဲ့ သားနဲ့ကသူငယ်ချင်း။ အခုလေးတင် အဲဒီမန်နေဂျာနဲ့တွေ့ခဲ့ပြီ။ သူ့ရဲ့ ``ဘော့စ်`` ဆီကို ဖုန်းဆက်တယ်တဲ့ သူ့ရဲ့ ``ဘော့စ်``က ပြန်ပြောတယ်။ အိမ်မီးလောင်တာ မြေ မီးလောင်တာမှ မဟုတ်ဘူး။ ဝယ်မယ်လို့ဆုံးဖြတ်ထားတဲ့ကိစ္စ။ ဝယ်မယ်တဲ့။ အဲ့ဒီမြေပေါ်မှာ အဆောက်အအုံအသစ် ပြန်ဆောက်မယ်လို့ပြောတယ် အဖေ``

``မင်းဟာက သေချာရဲ့လားကွ``

``သေချာပါတယ်အဖေရ၊ သား အခုလေးတင် မန်နေဂျာနဲ့စကားပြောလာတာ။ သားရှေ့မှာတင် သူဖုန်းဆက်ပြီး မေးတာ။ အဖေ စိတ်အေးအေးထားပါဗျာ``

အဲဒီအချိန်မှာအိမ်ကြီးက မီးတော်တော်ကျွမ်းနေပါပြီ။ အိမ်နောက်ပိုင်းတစ်ပိုင်းလုံး မရှိတော့ဘူး။ ဘာပစ္စည်းမှလည်း မသယ်ဖြစ်ကြဘူး။ သားငယ်ရဲ့စကားကိုလည်းကြားရော သူ့အဖေဟာ မျက်ရည်တွေကို သုတ်လိုက်တယ်။ ပုဆိုးကို ပြင်ဝတ်လိုက်တယ်။ မြေကြီးပေါ်ကို ထိုင်ချလိုက်တယ်။ သူများအိမ် မီးလောင်နေသလို အကြည့်မျိုးနဲ့ အေးဆေးသက်သာစွာပဲ သက်ပြင်းချလိုက်ပါတယ်။

``တော်ပါသေးရဲ့။ ဒီလို…. ကတိတည်တဲ့သူနဲ့ တွေ့ရတာ အဖေတော့ ကံကောင်းတာပဲ``

မီးလောင်နေတဲ့အိမ်ကြီးကို သားအဖတွေ ထိုင်ပြီးကြည့်နေကြတယ်။ ကိုယ့်အိမ်မဟုတ်ဘူးဆိုတဲ့အသိကြောင့် ရင်ထဲမှာအေးသွားတယ်။ လူတွေကလည်း ဘာမှမတက်နိုင်တော့ မီးသူ့ဘာသာသူ ငြိမ်းမယ့်အချိန်ကိုပဲ စောင့်ကြည့်နေသလိုဖြစ်နေတယ်။ ဒီလိုနဲ့ အိမ်ကြီးဟာ ပြာပုံဖြစ်ခါနီးနေပြီ။ အဲဒီအချိန်မှာ အငယ်ဆုံး သမီးက ငိုပြီးတော့ သူတို့ရှိရာကိုပြေးလာတယ်။

``အဖေရေ… ဒီအိမ်ကြီးကို ဝယ်လက်က စရန် အဆုံးခံမယ်တဲ့``

သားအငယ်ကဝင်ပြောတယ်။

``နင်ကလည်း မဟုတ်တာ။ ငါအခုလေးတင် မန်နေဂျာနဲ့တွေ့ခဲ့တာ သူ့ရဲ့ ဘော့စ်က မြေကို မီးလောင်တာမဟုတ်ဘူးတဲ့။ ပေးထားတဲ့ ကတိအတိုင်းဝယ်မယ်တဲ့။ ငါနားနဲ့ ဆတ်ဆတ်ကြားခဲ့ရတာ``

အဲဒီအချိန်မှာ သူတို့အဖေဟာ သွေးတိုးသလိုလို ဖြစ်လာတယ်။ မောသလိုလိုဖြစ်လာတယ်။

``အငယ်မ နင်ဘာတွေလာပြောနေတာလဲ၊ အဖေ့ကို သေချာရှင်းပြစမ်း။ ငါသေလိမ့်မယ်။ အကြီးကောင်က တစ်မျိုး၊ အလတ်ကောင်က တစ်မျိုး၊ အငယ်ကောင်က တစ်မျိုး၊ နင်ကတစ်မျိုးနဲ့``

``ဟုတ်တယ်အဖေရ၊ သမီးရှေ့မှာ မန်နေဂျာဆီ ဖုန်းထပ်လာတယ်။ ဒီတစ်ခါဖုန်းဆက်တာကတော့ ဘော့စ်ရဲ့ မိန်းမကဆက်တာတဲ့။ ဒီလို မီးလောင်မှတော့ ဘယ်လိုလုပ်ပြီး ``လာဘ်`` ရှိမှာလဲတဲ့။ ဒီလို အတိတ်နမိတ်မကောင်းတဲ့ မြေကို မဝယ်ရဘူးတဲ့။ စရန်ကို အဆုံးခံမယ်တဲ့ အဖေရ``

သမီးစကားလည်း ဆုံးရော…. အဲဒီအဖေကြီးက သတိမေ့သွားပါတော့တယ်။

*******

အတ္တစိတ်ဟာ ကြောက်စရာကောင်းလိုက်တာ။

မီးလောင်တဲ့ဖြစ်ရပ်က အတူတူပဲ။

ငါ့အိမ်ဆိုတဲ့ စိတ်ပူးကပ်နေချိန်မှာ အတ္တဟာ ဥခွံထဲက ဖောက်ထွက်လာပါတော့တယ်။

ငါ့အိမ်မဟုတ်တော့ဘူးဆိုတဲ့ အသိစိတ် ဖြစ်သွားချိန်မှာ အတ္တဟာ ဥခွံထဲမှာငုပ်လျှိုးပြီးနေပြန်တယ်။

ကျွန်တော် စိတ်ထဲမှာ အဲဒီဖြစ်ရပ်ကိုကြည့်ပြီး အတ္တစိတ်ရဲ့ ရွေ့လျားမှုတွေကို အတိုင်းသားမြင်တွေ့လိုက်ရတယ်။

ငါ့ဟာ…. ငါ့ဥစ္စာ… ငါ့ပစ္စည်း…

ငါ့မြေ… ငါ့သား… ငါ့မယား…

ငါ.. ငါ… ငါ.. ဆိုတဲ့ အတ္တစိတ်ဟာ ကျွန်တော်တို့ကို သံသရာ တစ်လျှောက်လုံး ဒုက္ခပေးနေတာ။ ပူလောင်မှေုတွေပေးနေတာကို အတိုင်းသား မြင်လိုက်ရပါတော့တယ်။

အတ္တစိတ်ဆိုတဲ့ ``အကောင်`` ဥခွံထဲက ပေါက်ထွက်လာတာကို သတိနဲ့ ဉာဏ်နဲ့ ကြည့်ကြရအောင်ဗျာ….။

 ``တွင်း`` ဆိုသော စာအုပ်မှ ခေါင်းစဉ်လေးများကို အွန်လိုင်းပေါ်မှ စာဖတ်ပရိသတ်များအတွက် ပြန်လည် မျှဝေ ပေးလိုက်ခြင်း ဖြစ်ပါတယ်။

ဦးဘုန်း(ဓာတု)
 မန္တလေး။

နောက်ဆုံး ဖယောင်းတိုင်

ပုံပြင်တစ်ပုဒ်လောက် ပြောပြပါရစေ။

ဒီပုံပြင်မှာ ရည်ရွယ်ချက် ရှိပါသည်။

လူဆိုတာ တစ်ယောက်ထည်း နေလို့ မရဘူး။ အသိုင်းအဝိုင်း၊ အပေါင်းအသင်းနဲ့ နေရတယ်။ အနည်းဆုံး ကိုယ့်မိသားစုနဲ့ ပေါင်းရတယ်။ သင်းရတယ်။ အမြဲတမ်း ထိတွေ့ဆက်ဆံနေရတော့ စိတ်ထဲမှာ အဆင်မပြေမှုတွေ၊ ပြဿနာတွေ၊ အားမလိုအားမရဖြစ်မှုတွေ ရှိနိုင်ပါတယ်။ ဒီပုံပြင်လေးဟာ အဖွဲ့အစည်းတစ်ခုနဲ့ တစ်ခုအကြား၊ မိဘနဲ့ သားသမီးအကြား၊ ဆရာနဲ့ တပည့်အကြား၊ လင်မယား နှစ်ယောက်အကြား၊ သူငယ်ချင်း နှစ်ယောက်အကြားမှာ ထားသင့်ထားအပ်တဲ့ အတွေးတစ်ခုကို ပေးပါလိမ့်မယ်။

*********

တစ်ခါတုန်းက……….

အလင်းမရှိဘဲ မှောင်နေတဲ့ အခန်းတစ်ခန်းထဲမှာ ဖယောင်းတိုင်ကလေး (၅)တိုင် ရှိတယ်။ အဲဒီ ဖယောင်းတိုင်တွေမှာ အလင်းကိုယ်စီနဲ့ပေါ့။ ဖယောင်းတိုင် (၅)တိုင်ရဲ့ အလင်းအားကြောင့် မှောင်မည်းနေတဲ့အခန်းဟာ လင်းထိန်နေတော့တယ်။ ဒီအခန်းထဲကို လေပြေပျော့လေး တိုက်ခတ်နေသတဲ့။ တစ်ခါတစ်ခါမှာ လေဟာ ပြင်းသွားလိုက်၊ တစ်ခါတစ်ခါမှာ လေဟာ ငြိမ်သွားလိုက်နဲ့ပေ့ါ။

လေတစ်ချက်အဝေ့မှာ ဖယောင်းတိုင်လေး တစ်တိုင် မီးငြိမ်းသွားတယ်။ အခန်းဟာ အလင်းအား နည်းနည်း လျော့သွားတယ်။ အဲ့ဒီဖယောင်းတိုင်လေးကို ``အချစ်`` လို့ နာမည်ပေးကြည့်ရအောင်။ ``အချစ်ဆိုတဲ့ အလင်းအားလေး`` လျော့သွားတော့ အခန်းဟာ နည်းနည်းလေး မှောင်သွားတယ်။

နောက်ထပ် လေအဝှေ့မှာ ဒုတိယ ဖယောင်းတိုင်လေး မီးငြိမ်းသွားပြန်တယ်။ အဲဒီ ဖယောင်းတိုင်လေးကို ``သံယောဇဉ်`` လို့ နာမည်ပေးကြည့်ရအောင်။ ဒီအခန်းထဲမှာ ``အချစ်`` ဆိုတဲ့ အလင်းရောင်ရယ်၊ ``သံယောဇဉ်`` ဆိုတဲ့ အလင်းရောင်ရယ် မရှိတော့ဘူး။ အခန်းဟာ အမှောင်ထု ကြီးစိုးလာတော့တယ်။

ဒီလိုနဲ့ နောက်ထပ် ```လေတစ်ချက်`` အဝေ့မှာ တတိယ ဖယောင်းတိုင်လေး ငြိမ်းသွားပြန်တယ်။ အဲဒီဖယောင်းတိုင်လေးကို ``မေတ္တာတရား`` လို့ နာမည်ပေးကြည့်ရအောင်။

ဒီလိုပဲ… နောက်ထပ် လေအဝေ့တစ်ချက်မှာ စတုတ္ထဖယောင်းတိုင်လေး ငြိမ်းသွားပြန်တယ်။ ဒီဖယောင်းတိုင်လေးကိုတော့ ``ကရုဏာ တရား`` လို့ နာမည်ပေးကြည့်ရအောင်။

ဖယောင်းတိုင် (၅) တိုင် အလင်းအားရှိတဲ့ ဒီအခန်းဟာ ဖယောင်းတိုင် (၁)တိုင်မျှသာ အလင်းအားရှိတော့တယ်။ ဒီနောက်ဆုံး ဖယောင်းတိုင်လေးသာ လေအဝေ့မှာ မီးညွန့်ကလေးငြိမ်းသွားခဲ့ရင်  ဒီတစ်ခန်းလုံး မှောင်မည်းသွားတော့ မှာပါပဲ။

ဖြစ်ချင်တော့ ဒီအခန်းထဲကို လူတစ်ယောက် ရောက်လာတယ်။

``အခန်းကြီးက မှောင်းမည်းနေတာပဲ။ တော်သေးတာပေါ့။ ဖယောင်းတိုင်လေးတစ်တိုင် လင်းနေသေးလို့``

ပြောပြောဆိုဆို ဖယောင်းတိုင်ရဲ့ မီးညွန့်ကို လက်ဝါးလေးနဲ့ ကာလိုက်တယ်။ အလင်းရောင် မှိန်ပျပျအောက်မှာ မီးငြိမ်းနေတဲ့ ဖယောင်းတိုင် (၄)တိုင်ကို တွေ့သွားတယ်။ ချက်ချင်းဆိုသလိုပဲ နောက်ဆုံးကျန်နေတဲ့ ဖယောင်းတိုင်ရဲ့ မီးညွန့်ကိုကူးပြီး မီးငြိမ်းသွားခဲ့တဲ့ ဖယောင်းတိုင်လေးတွေကို မီးကူးပေးလိုက်တယ်။ ဒီအခန်းက အရင်အတိုင်းပဲ ပြန်ပြီး လင်းထိန်သွားပါတော့တယ်။

**********

စာဖတ်သူကို မေးပါရစေ……

ဒီနောက်ဆုံးကျန်တဲ့ ဖယောင်းတိုင်လေးကို ကျွန်တော်တို့ နာမည်ပေးကြည့်ကြရအောင်။ စာဖတ်သူလည်း ကြိုက်သလို နာမည်ပေးပါ။ ကျွန်တော်ပေးထားတဲ့ နာမည်လေးတော့ ရှိတယ်။ ကျွန်တော်က နောက်ဆုံး ဖယောင်းတိုင်လေးရဲ့ နာမည်ကို ``နားလည်ပေးမှု၊ စာနာပေးမှု ဖယောင်းတိုင်`` လို့ နာမည်ပေးထားတယ်။

တွေးကြည့်ရအောင်။

လူတစ်ယောက်နဲ့ တစ်ယောက်အကြားမှာ ``နားလည်ပေးမှု၊ စာနာပေးမှု`` ဆိုတဲ့ အလင်းအား ရှိတဲ့ ဖယောင်းတိုင်လေးသာ ရှိနေသေးရင် ``အချစ်``ဆိုတာ ပြန်ဖြစ်နိုင်တယ်။ ``သံယောဇဉ်`` ဆိုတာ ပြန်ဖြစ်နိုင်တယ်။ ``မေတ္တတရား၊ ကရုဏာတရား``တွေ ပြန်ဖြစ်နိုင်တယ်။ ``နားလည်ပေးမှု၊ စာနာပေးမှု`` ဆိုတဲ့ ဖယောင်းတိုင်လေးသာ မီးငြိမ်းသွားခဲ့ရင်… အခန်းကြီး မှောင်မည်းသွားသလို အချစ်တွေ၊ မေတ္တာတရားတွေ၊ သံယောဇဉ်တွေ၊ ကရုဏာတရားတွေ ပြန်ဖြစ်ဖို့ မလွယ်တော့ပါဘူး။ လူ့ဘဝရဲ့ အနှစ်သာရလည်း ပျက်စီးသွားတော့မှာပါပဲ။

မိသားစု အချင်းချင်းအကြားမှာ၊ သူငယ်ချင်းနှစ်ယောက်အကြားမှာ၊ မောင်န်ှမနှစ်ယောက်အကြားမှာ၊ လင်းမယားနှစ်ယောက်အကြားမှာ၊ အဖွဲ့အစည်းတစ်ခုနဲ့ တစ်ခုအကြားမှာ ``နားလည်ပေးမှု၊ စာနာပေးမှု``ဆိုတဲ့ ဖယောင်းတိုင်လေး လင်းနေဖို့ လိုမယ်ထင်ပါတယ်။ ဒီဖယောင်းတိုင်လေးသာ မီးငြိမ်းသွားခဲ့ရင်… လူမှုဆက်ဆံရေးရဲ့ ပျော်စရာကောင်းတဲ့ သဘာဝကို ခံစားနည်းလည်နိုင်တော့မှာ မဟုတ်ပါဘူး။

ချစ်သူနှစ်ယောက်အကြားမှာ ``နားလည်ပေးမှုနဲ့ စာနာပေးမှု`` ရှိရင် ပျော်စရာ သိပ်ကောကင်းမှာပဲ။

မိဘအပေါ်မှာ နားလည်ပေးတက်တဲ့ သားသမီးတွေကို ပိုင်ဆိုင်ခွင့်ရတဲ့ မိသားစုဟာ ပျော်စရာကြီးပါ။ ဒီလိုပါပဲ နားလည်ပေးတက်တဲ့၊ စာနာပေးတက်တဲ့ မိဘတွေရဲ့ သားသမီးဖြစ်ခွင့်ရရင်လည်း ပျော်စရာပါပဲနော်။

ကိုယ့်ကို နားလည်ပေးတဲ့၊ စာနာပေးတဲ့ ချစ်သူနဲ့သာ အတူနေခွင့်ရရင် အချစ်ဆိုတာ ပျော်စရာပဲလို့ ခံစားမိမှာပါ။

အပြန်အလှန် နားလည်ပေးတဲ့၊ စာနာပေးတဲ့ လူ့အဖွဲ့အစည်းတွေသာ ကျွန်တော်တို့ ဝန်းကျင်းမှာရှိခဲ့ရင် ကျွန်တော်တို့ လူ့ဘောင်လောကကြီးဟာ ဒီထက်ပိုပြီး သာယာလာပါမယ်။ ငြိမ်းချမ်းလာပါမယ်။ တိုးတက်လာပါမယ်။ ပျော်စရာလည်း ကောင်းလာပါမယ်။

ဒါကြောင့် ဘယ်နေရာမှာ မဆို ``နားလည်ပေးမှုနဲ့ စာနာပေးမှု`` အပြန်အလှန်ရှိကြမယ်ဆိုရင် လောကကြီးဟာ ငြိမ်းချမ်းနေမှာပါ။

ဒါပေမယ့်….

``နားလည်ပေးမှုနဲ့ စာနာပေးမှု `` ကိုတော့ အလွဲသုံးစား မလုပ်သင့်ဘူးနော်။

``နားလည်ပေးမှုနဲ့ စာနာပေးမှု`` ကို အခွင့်ကောင်းမယူသင့်ဘူး။

``နားလည်ပေးမှုနဲ့ စာနာပေးမှု`` ကို တန်ဖိုးမဲ့အောင် မလုပ်သင့်ဘူးနော်။

စာဖတ်သူလည်း နောက်ဆုံး ဖယောင်းတိုင်လေးရဲ့ နာမည်ကို ဘယ်လိုများ မှည့်ခေါ်ချင်ပါသလဲ။

ဒီပုံပြင်လေးကို ဖတ်ပြီး….

``ချစ်သူတွေ၊ သူငယ်ချင်းတွေ၊ မိသားစုတွေ၊ လူသားတွေ၊ အဖွဲ့အစည်းတွေ`` ရဲ့ကြားမှာ ``နားလည်ပေးမှုနဲ့ စာနာပေးမှု``  ဆိုတဲ့ အလင်းရောင်ကလေးနဲ့ `` အချစ်တွေ၊ သံယောဇဉ်တွေ၊ မေတ္တာတရားတွေ၊ ကရုဏာတရားတွေ`` ပြန်ပြီး ရှင်သန်ထွန်းလင်းကြပါစေလို့ ဆန္ဒပြုလိုက်ပါတယ်။

တွေးဆကြည့်ကြဖို့ပါခင်ဗျာ။

နီးနီးဝေးဝေး အတွေးလက်ဆောင် စာအုပ်မှ...

ဦးဘုန်း(ဓာတု)
မန္တလေး

ဘောက်ဖတ်နှင့် လိပ်ပြာ

တစ်ခါတုန်းက..

ဘောက်ဖတ်ကလေး တစ်ကောင် ရှိတယ်။

သူဟာ တွန့်လိမ် တွန့်လိမ်နဲ့ သစ်ရွက်ကလေးတစ်ရွက်ပေါ်မှာ နေနေရရှာတယ်။ နေပူတော့လည်း နားခိုစရာ မရှိ။ နှင်းရွှဲတော့လည်း ချမ်းခိုက်ခိုက်တုန်။ ကိုယ်ဘဝကို စိတ်ကုန်နေရှာသတဲ့။ စားရပြန်တော့မလည်း သစ်ရွက်၊ နေရပြန်တော့လည်း သစ်ရွက်၊ နေပူ၊ လေတိုက်၊ သစ်ပင်ပေါ်က အမှိုက်တစ်စလို ကိုယ့်ကိုကိုယ် ခံစားမိပြီး အားငယ်နေရှာတယ်။

လေအတိုက် လေအကြမ်းမှာ လွင့်ကျမသွားဖို့ သူ မနေချင်ဘူးဆိုတဲ့ သစ်ရွက်ကလေးကိုပဲ မြဲမြဲကုပ်တွယ်ထားရရှာတယ်။

သူမပျော်နိုင်ရှာပါဘူး။

ခန္ဓာကိုယ်က ပျော့စိစိနဲ့ ရွံစရာကလည်း ကောင်း၊ အပေါင်းအသင်းကလည်း မရှိ၊ တွေးကြည့်ရင် သူ့ဘဝဟာ ဝမ်းနည်းစရာပါ။

ခုန်ပေါက်ပြီး ဆော့ကစားနေတဲ့ ဓားခုတ်ကောင်လေးတွေကို ကြည့်ပြီးအားကျ၊ ဝမ်းနည်းဖြစ်နေ၇ှာသတဲ့ ။ သူတို့လိုလည်း မြင့်မြင့်ကို မခုန်နိုင်၊ သူတို့လိုလည်း မသန်စွမ်း၊ သူတို့လိုလည်း အားမာန်တွေမိရှီ၊ သူတို့လိုလည်း အတောင်မပါ။ သူတို့လိုလည်း ဝေးဝေးမသွားနိုင်၊ ငါဟာ ဘာမှ အသုံးမကျတဲ့ အကောင်ပဲလို့ တွေးပြီး စိတ်ဓာတ်တွေလည်း တဖြည်းဖြည်း ကျလာတယ်။ တွေးလိုက်တိုင်း စိတ်အားငယ်စရာတွေချည်းပဲ။  ငါသေချင်လိုက်တာလို့ အမြဲစဉ်းစားနေသတဲ့။ သိမ်ငယ်စိတ်တွေနဲ့ပေါ့။

ဘောက်ဖတ်ကလေးရေ….

မင်း မသိလို့ပါ။

မင်းဟာ တစ်နေ့နေ့ တစ်ချိန်ချိန်မှာ အမြင့်ကိုလည်း ပျံသန်းနိုင်တဲ့၊ လေတွေကိုလည်း တစ်ဝကြီး ရှူသွင်းခွင်ရတဲ့ အရောင်အသွေးစုံတဲ့၊ အသွေးအရောင်လှပတဲ့ ၊ တောင်ပံတွေကို ပိုင်ဆိုင်နိုင်တဲ့ လိပ်ပြာလှလှလေးတစ်ကောင် ဖြစ်လာမှာပါ။ လှပတဲ့ ပန်းကလေးတွေကို မင်းကြိုက်သလို နားခွင့်ရမှာပါ။ ပန်းကလေးတွေကိုလည်း မျိုးဆက်ပြန့်ပွားဖို့ ဝတ်မှုန်ကူးပေးနိုင်သူ ဖြစ်လာမှာပါ။ ပန်းလှလှလေးတွေလိုပဲ ဥယျာဉ်ကြီးကို ပိုပြီး လှပလာအောင် မင်းရဲ့ တောက်ပ အရောင်စုံတဲ့ အတောင်ပံလေးတွေနဲ့ ကူညီပေးနိုင်သူ ဖြစ်လာမှာပါ။ မင်း ဘာလို့ အားငယ်နေရတာလဲ။ 

********

ကျွန်တော် တွေးမိတာလေး ရေးလိုက်တာပါ။

ဟုတ်ပါတယ်။

ကျွန်တော်ဟာ တစ်ချိန်တုန်းက ဘောက်ဖတ်ကလေးတစ်ကောင်ပါ။

ကိုယ့်ဘဝကို စိတ်ကုန်ခဲ့ဖူးတယ်။

မျှော်လင့်ချက်တွေ ပျောက်ဆုံးခဲ့ဖူးတယ်။

ရည်မှန်းချက်တွေ တစ်ခုမှဖြစ်မလာတော့ တစ်ယောက်တည်း ကျတ်ပြီး ငိုခဲ့ဖူးတယ်။

ဘာကိုမှ ပိုင်ဆိုင်ခွင့်၊ ဖန်တီးခွင့် မရှိတော့ဘူးလို့ အဆုံးထိတွေးပြီး စိတ်ဓာတ်တွေ ကျခဲ့ဖူးတယ်။

ဘဝဆိုတာ ကိုယ်ဖြစ်ချင်တာတွေ တစ်ခုမှ မဖြစ်တက်ဘူးလို့ တွေးပြီး သောကတွေနဲ့ အိပ်မပျော်ဖြစ်ခဲ့ဖူးတယ်။

အခုတော့ လိပ်ပြာလှလှလေးတစ်ကောင် ဖြစ်နေပါပြီ။

********

ဒီနေ့ လူငယ်ကျောင်းသားတွေကို ပြောပါရစေ။

မင်းတို့ဟာ ဒီအချိန်မှာ ဘောက်ဖတ်ကလေးတွေပါ။ ကိုယ့်ရဲ့ မပြည့်စုံမှု၊ အခက်အခဲ၊ ပြဿနာတွေကြောင့် စိတ်ဓာတ်မကျပါနဲ့ ။ ဖြစ်နေတဲ့ ဘဝကို ကျေကျေနပ်နပ်ကြီး လက်ခံလိုက်စမ်းပါ။ ပတ်ဝန်းကျင်ကို မော့ကြည့်ပြီး ကိုယ်နဲ့ နှိုင်းလို့ အားမငယ်ကြပါနဲ့။ ကိုယ့်ကိုကိုယ်လည်း အထင်မသေးနဲ့နော်။ ကိုယ့်ကိုကိုယ်အထင်သေးတယ်ဆိုတာ ကျရှုံးမှု တစ်မျိုးပဲနော်။ စိတ်အားငယ်တယ်ဆိုတာ ကြိုတင်ပြီး အရှုံးပေးခြင်းတစ်မျိုးပဲနော်။ ဝမ်းနည်းတယ်ဆိုတာ ။ ကိုယ့်ကိုကိုယ် သနားတယ်ဆိုတာ နိမ့်ကျတဲ့ စိတ်ဓာတ်မျိုးနော်။ မင်းတို့ ဟာ တစ်နေ့နေ့ တစ်ချိန်ချိန်မှာ လှပတဲ့ အရောင်အသွးစုံတဲ့ ချစ်စရာကောင်းတဲ့ လိပ်ပြာကလေးတွေ ဖြစ်လာမယ်ဆိုတာ ယုံလိုက်စမ်းပါကွယ်။

အခုတော့. စစ်ဗိုလ်ကြီး၊ ပညာတက်ကြီး ၊ ဆရာဝန်ကြီး၊ အင်ဂျင်နီယာကြီး ၊ အရာရှိကြီး၊ ကျောင်းဆရာ၊ ဆရာမတွေပေါ့၊ အဆိုတော်ကြီး၊ အနုပညာရှင်ကြီး၊ ရုပ်ရှင်သရုပ်ဆောင်ကြီး၊ ပန်းချီဆရာကြီး၊ အယ်ဒီတာကြီး၊ စာရေးဆရာကြီးတွေပေါ့။ ကွန်ပျူတာပညာရှင်ကြီး၊ ကုမ္မဏီပိုင်ရှင်ကြီး၊ စီးပွားရေးပညာရှင်ကြီး၊ စတိုးဆိုင်ပိုင်ရှင်ကြီးတွေပေါ့။ လိပ်ပြာလှလှလေးတွေ ဖြစ်နေကြပြီ။ သူတို့လည်း တစ်ချိန်တုန်းက ဘောက်ဖတ်ကလေးဘဝကို ဖြတ်သန်းခဲ့ဖူးတယ်ဆိုတာ သိစေချင်တယ်။

ဒါ့ကြောင့်.

ဘောက်ဖတ်ကလေးရေ.

ငိုမနေနဲ့၊ ဝမ်းနည်းမနေနဲ့ ၊ ကြေကွဲမနေနဲ့၊

သေချင်လောက်အောင်လည်း စိတ်ဓာတ်ကျမနေနဲ့။

မင်းဟာ တစ်ချိန်ချိန်မှာ မိဘအတွက်၊ ဆွေမျိုးအတွက်၊ ပတ်ဝန်းကျင်အတွက်၊ အမျိုးဘာသာ သာသနာအတွက်၊ လူသားတွေအတွက်၊ ကမ္ဘာကြီးအတွက်၊ အသုံးဝင်မယ့် အကျိုးပြုမယ့်၊ အဖိုးအနဂ္ဂထိုက်တန်တဲ့ လိပ်ပြာလှလှလေးတစ်ကောင်ဖြစ်လာမယ်ဆိုတာ ယုံလိုက်စမ်းပါကွယ်။

တစ်ခေုတော့ မှာချင်တယ်။

လိပ်ပြာဘဝရပြီဆိုရင်လည်း လိပ်ပြာတာဝန်ကို ကျေစေချင်တယ်။

အတ္တကြီးတဲ့ လိပ်ပြာ၊ တစ်ကိုယ်ကောင်းဆန်တဲ့ လိပ်ပြာ၊ မနာလိုတက်တဲ့ လိပ်ပြာ၊ ဝန်တိုတက်တဲ့ လိပ်ပြာ၊ ကြွးဝါတက်တဲ့ လိပ်ပြာ၊ ဘဝမေ့တက်တဲ့ လိပ်ပြာ၊ ဘဝင်မြင့်တဲ့ လိပ်ပြာ မဖြစ်စေချင်ဘူး။

ကိုယ်ချင်းစာတက်တဲ့ လိပ်ပြာ၊ မေတ္တာ ကရုဏာရှိတဲ့ လိပ်ပြာ၊ ကိုယ့်တာဝန်ကို ကျေပွန်အောင် ဝမ်းဆောင်တက်တဲ့ လိပ်ပြာ၊ ဇွဲရှိတဲ့ လိပ်ပြာ၊ ဝီရိယရှိတဲ့လိပ်ပြာ၊ အလုပ်ကြိုးစားတဲ့ လိပ်ပြာ၊ ဟန်ဆောင်မှုကင်းတဲ့ လိပ်ပြာ၊ ရိုးသားတဲ့ လိပ်ပြာ၊ လိပ်ပြာအချင်းချင်း အချစ်ခံရတဲ့ လိပ်ပြာလေးတစ်ကောင်ဖြစ်ဖို့ ကြိုးစားစေချင်တယ်။

နောက်တစ်ခု မှာပါရစေဦး။

လိပ်ပြာဆိုတဲ့ ဘဝတစ်ခုဟာလည်း အကြာကြီး မဟုတ်ဘူးဆိုတာ သိထားဦးနော်…။

ရတဲ့အချိန်တိုအတွင်းမှာ အကောင်းဆုံးတွေကို ဆောင်ရွက်ပါနော်။

ဘောက်ဖတ်နဲ့ လိပ်ပြာကလေးတွေကို မြင်တွေ့တိုင်း…………

လူငယ်လေးတွေရဲ့ စိတ်ထဲမှာ ကိုယ့်ဘဝနဲ့ နှိုင်းလို့ အားမာန်တွေ မွေးကြစမ်းပါ…။

အားမငယ်ကြဖို့ပါ။

ဦးဘုန်း(ဓာတု)
မန္တလေး